މަޖިލީހުގައި ކުރެވޭ ސުވާލުތަކަށް ޖަވާބުދެއްވުމަށް ތައްޔާރުވެގެން ވަޑައިގަތުމަށް މަޖިލީހުގެ ނާއިބް ރައީސް އީވާ އަބްދުﷲ އެދިވަޑައިގެންފިއެވެ.
އީވާ މިގޮތަށް ވިދާޅުވީ، މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރ ސްޓްރަކްޗަރ މުޙައްމަދު އަސްލަމް މިއަދު މަޖިލީހަށް ހާޒިރުކޮށް ސުވާލުކޮށްފައި ވަނިކޮށެވެ. މިއަދުގެ ޖަލްސާގައި މިނިސްޓަރ އަސްލަމްއަށް މެމްބަރުން ގިނަ ސުވާލުތަކެއް ކުރެއްވި ނަމަވެސް އެކަށީގެންވާ ޖަވާބެއް ދެއްވާފައި ނުވާ ކަމަށް މެމްބަރުން ދިޔައީ ފާހަގަކުރައްވަމުންނެވެ.
ރައްޔިތުންގެ މަޖިލީހުގެ ތަޅުމުގައި ކުރެވޭ ސުވާލުތަކަށް ޖަވާބު ދެއްވުމަށް ވަޒީރުން ވަޑައިގަތުމުގެ ކުރިން 14 ދުވަހުގެ ނޯޓިސްއެއް ލިބޭގޮތަށް އޮންނަނީ ހަމަޖައްސާފައެވެ. އީވާ ވިދާޅުވީ ލިބިވަޑައިގަންނަވާ 14 ދުވަސް ހަމަވެ، ވަޒީރަކު މަޖިލީހަށް ހާޒިރުވާއިރު މެމްބަރުން ކުރާ ސުވާލުތަކަށް ޖަވާބު ދެވެން ޖެހޭނެ ކަމަށް ގަބޫލުކުރައްވާ ކަމަށެވެ.
ހައުސިން މިނިސްޓަރ އަސްލަމް މިއަދު މަޖިލީހަށް ހާޒިރުކޮށްފައިވަނީ ށ.ފޭދޫ، ބިލެތްފަހި، ގޮއިދޫ، އަދި ނޫމަރާ ގެ ފެނާއި ނަރުދަމާގެ މަސައްކަތާ ގުޅޭ ގޮތުން ސުވާލު ކުރެއްވުމަށެވެ. މި މައްސަލައާއި ގުޅޭގޮތުން މިނިސްޓަރ އަސްލަމާއި ސުވާލު ކޮށްފައިވަނީ ކަނޑިތީމު ދާއިރާގެ މެމްބަރު އަބްދުالله ޝަހީމް އަބްދުލްހަކީމްއެވެ.
