ދުނިޔޭގެ ސިއްހަތުމުއިއްޔާގެ ދެކުނު އިރުމަތީ އޭޝިއާ ސަރަހައްދުގެ ރީޖަނަލް ކޮމިޓީގެ 74ވަނަ ބައްދަލުވުން މިއަދު ފަށައިފި
ކޮންމެ އަހަރަކު އެއްފަހަރު ބާއްވަމުން އަންނަ މި ބައްދަލުވުން ކޮވިޑް-19 ބަލިމަޑުކަމާ ގުޅިގެން މި އަހަރުވެސް ކުރިއަށް ގެންދަނީ "ވަރޗުއަލް" ބައްދަލުވުމެއްގެ ގޮތުގައެވެ. މި މަހުގެ 6ން 10ށް ކުރިއަށްދާ މި ބައްދަލުވުމުގައި ދިވެހިރާއްޖޭގެ ވަފުދުގެ ފަރާތުން އެންމެ އިސްކޮށް ހުންނަވަނީ މިނިސްޓަރ އޮފް ސްޓޭޓް ފޯ ހެލްތު ޑރ. ޝާހު އަބްދުﷲ މާހިރެވެ.
ދުނިޔޭގެ ސިއްހަތު ޖަމުއިއްޔާގެ ރީޖަނަލް ކޮމިޓީގެ ބައްދަލުވުމަކީ މި ސަރަޙައްދުގެ 11 ޤައުމުގެ ސިއްހަތާބެހޭ ވަޒީރުންނާއި ސިއްހީ ދާއިރާގެ އިސްވެރިންނާއި ފަންނީ ފަރާތްތައް ހިމެނޭގޮތަށް، މި ސަރަޙައްދުގެ ރައްޔިތުންގެ ސިއްހަތާގުޅޭ މުހިންމު ކަންކަން ކަނޑައަޅައި، މި ސަރަޙައްދުގެ ސިއްހަތާގުޅޭ ކަންކަން ކުރިއެރުމަށް މަޝްވަރާކޮށް، ނިންމުންތައް ނިންމާ އެންމެ މުހިންމު 'ގަވަރނަންސް' ބައްދަލުވުމެވެ.
މި އަހަރުގެ ބައްދަލުވުމުގައި މެންބަރު ގައުމުތަކުން ކޮވިޑް-19އާ ގުޅިގެން ކުރަމުންދާ މަސައްކަތްތަކާއި، ކުރެވުނު ތަޖުރިބާއާއި، މުސްތަޤުބަލުގައި ކުރެވިދާނެ ކަންކަމާ ގުޅޭގޮތުން ވަޒީރުންގެ ފެންވަރުގައި މަޝްވަރާ ކުރެވޭނެއެވެ. އަދި ކޮންމެހެން ފޯރުކޮށްދެންޖެހޭ ސިއްހީ ހިދުމަތްތައް މެދުނުކެނޑި ކުރިއަށްގެންދިއުމަށްޓަކައި ޤައުމުތަކާއި ސަރަޙައްދީ ފެންވަރުގައި ކުރެވިދާނެ މަސައްކަތްތަކާ ގުޅޭގޮތުންވެސް މަޝްވަރާ ކުރެވިގެންދާނެއެވެ. އަދި ކޯވިޑް-19ގެ ޙާލަތުގައި ދެމުންގެންދާ ސިއްހީ އަސާސީ ޚިދުމަތްތައް ހަރުދަނާކުރުމާ ގުޅޭގޮތުން ސިއްހަތާއިބެހޭ ވަޒީރުންގެ ގަރާރެއް ފާސްކުރެވިގެން ދާނެއެވެ.
މި ބައްދަލުވުމުގައި އެޖެންޑާ ކޮށްފައިވާ އިތުރު ކަންތައްތަކުގެ ތެރޭގައި އެޗް.އައި.ވީ، ވައިރަލް ހެޕަޓައިޓިސް އަދި އެސް.ޓީ.އައި ފެތުރުން ހުއްޓުމާގުޅޭ ނިންމުމުކާއި، ގައިންގަޔަށް ނާރާ ބަލިތައް މަދުކުރުމާއި ގުޅޭ ނިންމުމުކާއި، 2022 އަދި 2023ވަނަ އަހަރަށް މި ސަރަޙައްދަށް ހުށަހަޅައިފައިވާ ބަޖެޓާ ގުޅޭގޮތުން މަޝްވަރާކުރުން ހިމެނެއެވެ.
މީގެ އިތުރުންވެސް، ދެކުނު އިރުމަތީ އޭޝިއާ ސަރަޙައްދުގެ އެންމެ ސަމާލުކަންދޭ ޞިއްޙީ މައްސަލަތަކާއިގުޅޭ ގޮތުން މިބައްދަލުވުމުގައި މަޝްވަރާކޮށް، އެމައްސަލަތަކަށް ޤައުމުތަކާއި ދުނިޔޭގެ ސިއްހަތު ޖަމިއްޔާގުޅިގެން ކުރާނެ މަސައްކަތްތަކެއް ނިންމިގެންދާނެއެވެ.
