ކުދި ކުދި ތަންތަންކޮޅުގައި ދިރިއުޅޭ އާއިލާތަކަށް އެކަށީގެންވާ ގޯއްޗެއް ދޭން މިސަރުކާރުން ވި ވައުދު ނުފުއްދައި އަލުން ވެރިކަން ނުލިބޭނެ ކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) ވިދާޅުވެއްޖެ އެވެ.
ބޮންޑޭ މިފަދައިން ވިދާޅުވީ ރައްޔިތުންގެ މަޖިލީހުގައި ގޯތި ދިނުމާއި ގުޅޭގޮތުން ވާހަކަ ދައްވަމުންނެވެ. ސަރުކާރުން އެވައުދު ނުފުއްދާތީ ބޮންޑޭ އަމިއްލައަށް ހުށަހެޅުއްވި މައްސަލައިގެ ބަހުސްގައި އޭނާ ވިދާޅުވީ މާލެއަކީ އިޖުތިމާއީ މައްސަލަތަކުގެ ހާއްޔަކަށް ވެފައިވާ ކަމަށެވެ. ބޮންޑޭ ވިދާޅުވި ގޮތުގައި ގޮނޑުހޮވައިގެން ބައެއް މީހުން ކެއުމާއި، ޑްރަގުގެ ވަބާ އާއި ވަރިއާއި ކުށުގެ މައްސަލަތައްވެސް އިންތިހާއަށް ވަނީ އިތުރުވެފަ އެވެ.
ރަޝީދު ވިދާޅުވީ ޕެންޝަން ފަންޑުގައި 13 ބިލިއަނަށްވުރެއް ގިނައިން ފައިސާ އެބަހުރި ކަމަށާއި މާލެ ރައްޔިތުންނަށް ސަރުކާރުން ދޭ ގޯއްޗަށް އެއްފަހަރާ ޑައުންޕޭމެންޓު ދެއްކޭވަރަށް ފައިސާ އެބަހުރި ކަމަށެވެ. އެހެންކަމުން ފެންޝަން ފަންޑުގެ ފައިސާ އާއި ކުދި ތަންތަނުގައި ދިރިއުޅޭ މީހުންގެ ބިންތަށް ނަގައި އެމީހުންނަށް އެހެން ބިންތައް ދޭން މެމްބަރު ގޮވައިލެއްވި އެވެ.
ކުރީގެ ރައީސް އަބްދުﷲ ޔާމީންގެ ސަރުކާރުން ހުޅުމާލެ ދެވަނަ ފިޔަވަހީގައި ތަރައްގީކުރި ހިޔާ މަޝްރޫއަކީ ހައްލު ނޫންކަމަށް ރަޝީދު ވިދާޅުވި އެވެ. 7000 ފްލެޓުގެ ބަދަލުގައި މާލެއާ ކައިރި ހިސާބުތަކުން ބިން ދޭން ޖެހޭ ކަމަށްވެސް ވިދާޅުވި އެވެ.
ބޮންޑޭ ވިދާޅުވީ މާލޭގެ އިތުރުން ހުޅުމާލެއާއި ފުށި ދިއްގަރުންވެސް މާލެ ރައްޔިތުންނަށް ގޯތި ދެވިދާނެ ކަމަށެވެ.
ބޮންޑޭ މިފަދައިން ވިދާޅުވިއިރު މާލެ ސިޓީގެ މޭޔަރު ޑރ. މުހައްމަދު މުއިއްޒު ވަނީ މާލޭގައި ދަތި ހާލުގައި ދިރިއުޅޭ ރައްޔިތުންނަށް ހުޅުމާލެ ދެވަނަ ފިޔަވަހިން ގޯތި ދިނުމަށް ސަރުކާރުގައި އެދިލައްވައިފަ އެވެ. އެހެންނަމަވެސް ސަރުކާރުން ވަނީ ހުޅުމާލެއިން ބިން ވިއްކުމަށް މަސައްކަތް ފަށައިފަ އެވެ. ގިނަ މީހުންގެ ކަންބޮޑުވުމަކީ ބިން ވިއްކާނަމަ މުއްސަނދިންނަށް ބިންތައް ލިބި އާންމުންނަށް ބިން ނުލިބިދާނެ ކަމުގެ ކަންބޮޑުވުމެވެ.
