ދައުލަތުން މިލިއަނުން ހޭދަކޮށް ފައިސާ ދެއްކި ވެންޓިލޭޓަރުތައް ނުލިބުމުން އެތަކެތީގެ ބަދަލު ހޯދަން ނޯޓިސް ފޮނުވައިފި އެވެ.
ދިވެހި ސަރުކާރުގެ ފަރާތުން ދުބާއީގެ އެގްޒެކިއުޓާސްއަށް ނޯޓިސް ފޮނުވީ މިދިޔަ އޯގަސްޓު މަހުގެ 10 ވަނަ ދުވަހު އެވެ.
30 ދުވަހުގެ މުއްދަތެއް އެގްޒެކިއުޓާސްއަށް ދިންއިރު އެ މުއްދަތު އަންނަ ހުކުރު ދުވަހަށް ހަމަވާނެ އެވެ.
ހެލްތު މިނިސްޓްރީގެ އޮފިޝަލަކު ވިދާޅުވީ ވެންޓިލޭޓަރުގެ ބަދަލު ހޯދަން އެދުނުއިރު ބަދަލުގެ ގޮތުގައި އެދުނީ ކިހާ އަދަދެއްގެ ފައިސާއެއްތޯ ވިދާޅުވާން ބޭނުން ނުވާ ކަމަށެވެ. ބަދަލު ހޯދާނެ މިންވަރެއް ކަނޑައެޅީ އޮޑިޓް އޮފީހުން ހެދި ހާއްސަ އޮޑިޓަކުން ކަމަށާއި އެހެންކަމުން އެމައުލޫމާތު އާންމުކުރާނީ ސަރުކާރުން ކަމަށް އެ އޮފިޝަލް ވިދާޅުވި އެވެ.
ވެންޓިލޭޓަރު ގަންނަން ސަރުކާރުން އެގްޒެކިއުޓާސް އާއިއެކު އެއްބަސްވުމުގައި ސޮއިކޮށްފައިވަނީ މިދިޔަ 2020 ވަނަ އަހަރުގެ އޭޕްރީލް މަހުގެ ދެވަނަ ދުވަހު އެވެ. އޭގެ އަހަރެއް ފަހުންވެސް ވެންޓިލޭޓަރު ލިބިފައިނުވާތީ އެއްބަސްވުން ބާތިލް ކުރީ މިދިޔަ މެއިމަހުގެ ތެރޭގަ އެވެ.
75 ވެންޓިލޭޓަރު ގަންނަން ސަރުކާރުން ވަނީ އެޑްވާންސްގެ ގޮތުގައި 30 މިލިއަން ރުފިޔާ ދައްކައިފަ އެވެ. ބާކީ 4 މިލިއަން ދައްކާނީ ވެންޓިލޭޓަރުތައް ލިބުމުންކަމަށް ކަނޑައެޅި އެވެ. ގިނަ އަދަދެއްގެ ފައިސާ އެއްވެސް ގެރެޓީއަކާއި ނުލައި އެގްޒެކިއުޓާސް ކުންފުންނަށް ދިން މައްސަލަ ރައްޔިތުންގެ މަޖިލީހުންވެސް ނެގި އެވެ.
މިމައްސަލައާއި ގުޅިގެން އޭރުގެ ހެލްތު މިނިސްޓަރު މަގާމުންވެސް ވަކިކުރެއްވި އެވެ. އެންމެ ފަހުން ބަނޑާރަ ނައިބު އޮފީހުން ބުނެފައިވަނީ ބަދަލު ނުލިބިއްޖެނަމަ އާބިޓްރޭޝަން މަރުހަލާ ފަށާނެ ކަމަށެވެ.
އާބިޓްރޭޝަން ކުރިއަށް ގެންދަން ހަމަޖެއްސީ ރާއްޖެގެ އިންޓަނޭޝަނަލް އާބިޓްރޭޝަން ސެންޓަރުގަ އެވެ.
ވެންޓިލޭޓަރު މައްސަލައިގައި އެންޓި ކޮރަޕްޝަން ކޮމިޝަން، (އޭސީސީ) އިން ތިން ފަހަރެއްގެ މަތިން ދައުވާކުރަން ޕީޖީ އޮފީހަށް ފޮނުވި އެވެ. އެހެންނަމަވެސް އެކަށީގެންވާ ވަރަށް ހެކި ނެތްކަމަށް ބުނެ ދައުވާ ކުރަން ފޮނުވާފައެއް ނުވެ އެވެ.
