މޯލްޑިވިއަންގެ ގިނަ ޕައިލެޓުންތަކެއް އެއްފަހަރާ އިސްތިއުފާ ދީފި

ގައުމީ އެއާލައިން، މޯލްޑިވިއަންގެ ގިނަ ޕައިލެޓުންތަކެއް އެއްފަހަރާ އިސްތިއުފާ ދީފި އެވެ.

މައުލޫމާތު ލިބޭ ގޮތުގައި މިއަދު އިސްތިއުފާ ދިނީ ސީޕްލޭން 7 ޕައިލެޓުންނެވެ.

"ހަމައެމްވީ" އަށް މައުލޫމާތު ލިބިފައިވާ ގޮތުގައި ކޮވިޑް-19 ގެ ސަބަބުން ކުޑަކުރި މުސާރަ އަދިވެސް ޕައިލެޓުންނަށް ރުޖޫއަ ނުކުރެ އެވެ. އެހެންކަމުން ޕައިލެޓުންގެ އެންމެ ބޮޑު ކަންބޮޑުވުމަކީ ޕްރެޝަރާއިއެކު މަސައްކަތް ކުރަން ޖެހުނު ނަމަވެސް އެއާއި އެއްހަމަ މުސާރައެއް ނުލިބުމެވެ.

މީގެ އިތުރުން ޕައިލެޓުންގެ ޑިމާންޑުތަކުގެ ސަބަބުން ޕްރެޝަރު ބޮޑުވެ ފްލައިޓް އޮޕަރޭޝަންސް މެނޭޖަރުވެސް މިއަދުގެ ވަގުތެއްގައި އިސްތިއުފާ ދީފައިވާކަމަށް މައުލޫމާތު ލިބެ އެވެ.

މިމައުލޫމާތު ކަށަވަރުކުރަން މޯލްޑިވިއަންގެ ޕީއާރު އެންޑް ކޮމިއުނިކޭޝަންސް މޫސާ ވަސީމް އަށް "ހަމައެމްވީ" އިން ގުޅުމުން ވިދާޅުވީ ވަޒީފާތަކުން މީހުން ކެނޑުމާއި، ވަޒީފާއާއި ގުޅުމަކީ އާންމު ކަމެއް ކަމަށެވެ. އެހެންނަމަވެސް އާދަޔާ ހިލާފު ކަމެއް ދިމާވެގެން އުޅޭކަން އެނގިވަޑައިނުގަންނަވާ ކަމަށާއި އެފަދަ ކަމެއް އުޅޭނަމަ ކަށަވަރު ކުރެއްވުމަށްފަހު މައުލޫމާތު ދެއްވާނެކަމަށް މޫސަ ވިދާޅުވި އެވެ.

މައުލޫމާތު ލިބޭ ގޮތުގައި މޯލްޑިވިއަންގެ ހުރިހާ ޕައިލެޓުންގެ ހާއްސަ ބައްދަލުވުމެއް މިރޭ ބޭއްވުމަށް ދަނީ ތައްޔާރުވަމުންނެވެ.

މޯލްޑިވިއަންއިން މިދިޔަ މަހުގެ ތެރޭގައި ވަނީ ޕައިލެޓުންގެ ފްރެޝް ބެޗެއް ނެގުމަށް އިއުލާން ކޮށްފަ އެވެ.