ރައްޔިތުން މަގުތަކަށް ނުކުމެ އަޑު އުފުލުމުގެ އަދަބު ރައީސް އަބްދުﷲ ޔާމީން އަށް ނުދިނުމަށް އިދިކޮޅުން ގޮވާލައިފިއެވެ.
ޕީޕީއެމް ޕީއެންސީ ކޯލިޝަނުން ނެރުނު ބަޔާނެއްގައި ބުނެފައިވަނީ، "އިންސާފު ހޯދަން" ނަމުގައި މިއަދު ކުރިއަށް ގެންދިޔަ ސުލްޙަވެރި ހިނގާލުމުގައި ދިވެހި ރައްޔިތުން ވަނީ މި ސަރުކާރުން އިންސާފުގެ ބޭރުން ކުރަމުން ގެންދާ ކަންކަމާއި ދެކޮޅަށް އަޑު އުފުލުމުގެ އިތުރުން، ފަނޑިޔާރުންނަށް އެކި ގޮތްގޮތުން ފިއްތުންތައް ކުރިމަތި ކުރުވާ، ސިޔާސީ ނުފޫޒު ފޯރުވަމުން ގެންދާތީ، އެކަންކަން ހުއްޓާލާ އިންސާފު ޤާއިމު ކުރުމަށް ގޮވާލާފައި ކަމަށެވެ.
އަދި މި ސުލްޙަވެރި ހިންގާލުމުގެ ބައިވެރިން ރައީސް ޢަބްދުﷲ ޔާމީން ޢަބްދުލްގައްޔޫމްގެ ގެކޮޅާ ހަމައަށް އެރުމުން، އެމަނިކުފާނު ދެކިލުމަށް ބޭނުންވެފައި ތިބި އެތައް ސަތޭކަ ރައްޔިތުންނަށް ފެނިލުމަށް ގޭގެ ކުޑަދޮރުން ބޯދިއްކޮށްލައްވާ ބައިވެރިންނަށް އެމަނިކުފާނު ވަނީ އަތް ހޫރުވާ ސަލާމް ކުރައްވާފައެވެ. އަދި މިއީ އެއްވެސް ޙާލެއްގައި ގޭ ބަންދުގައި ހުންނަވާ ބޭފުޅަކަށް ނުކުރެއްވޭނެ ކަމެއްގެ ގޮތުގައި ދިވެހިރާއްޖޭގައި ހެދިފައިވާ އެއްވެސް ގާނޫނެއް، ގަވާއިދެއް ނުވަތަ އުސޫލެއްގައިވެސް ބަޔާންކޮށްފައިވާ ކަމެއް ނޫން ކަމަށެވެ. ހަމައެއާއެކު އެމަނިކުފާނާއި އެކު ދައުލަތުން އެއްބަސްވެފައިވާ އެއްވެސް އެއްބަސްވުމެއްގައިވެސް އޮތް ވާހަކައަކަށް ނުވާއިރު، އެމަނިކުފާނަށް ފިޔަވަޅު އަޅާނެ ކަމަށް ބުނެ ކޮމިޝަނަރ އޮފް ޕްރިސަންސް ޓްވީޓް ކުރައްވާފައިވާތީ، އިދިކޮޅުން ވަނީ ކަންބޮޑުވުން ފާޅުކޮށްފައެވެ.
