ރާއްޖެ ގޮއްވައިލާނެކަމަށް ބުނެ ފުލުފުލުގައި ބޮމުގެ އިންޒާރާއި މަރުގެ އިންޒާރުތައް ދެމުން ގެންދާއިރު އެކަން ސަރުކާރުން ސީރިއަސް މައްސަލަތަކެއްގެ ގޮތުގައި ނުނަގާތީ ރައްޔިތުންގެ މަޖިލީހުގެ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ކަންބޮޑުވުން ފާޅުކުރައްވައިފި އެވެ.
ހުޅުމާލެ ޖަލުގައި ޖަލުގެ ހުކުމް ތަންފީޒު ކުރަމުންދިޔަ މުހައްމަދު އަސްލަމް ނިޔާވުމާއި ގުޅިގެން އެކަން ތަހުގީގުކޮށް ބެލުމަށް ހުށަހެޅި ކުއްލި މައްސަލައިގައި ވާހަކަ ދައްވަމުން އިންތި ވަނީ މިހަފްތާގެ ތެރޭގައި މާލޭގައި ހުންނަ ނޫރު މިސްކިތުގެ ތަނބެއްފައި، ރާއްޖޭގައި ބޮމެއް ގޮއްވާނެ ކަމަށް ލިޔެފައި އޮތް އޮތުން ފާހަގަކުރައްވައިފަ އެވެ. އެގޮތުން ވިދާޅުވީ ނޫރު މިސްކިތަކީ މަރު ކޮމިޝަނުގެ ރިޕޯޓުގައި ފާހަގަކޮށްފައިވާ ގޮތަށް ޓެރަރިޒަމްގެ އަމަލުތައް ރާވައި ހިންގުމަށް ބޭނުންކުރާ މިސްކިތެއް ކަމަށެވެ.
ނޫރު މިސްކިތާއި ގުޅިގެން މީގެ ކުރިންވެސް ކަންބޮޑުވުންތަކެއް ހުރިއިރު އިންތި ވިދާޅުވީ މިކަމާއިމެދު އެކަށީގެންވާ ފިޔަވަޅުތަކެއް ނާޅައި، ބަލަންޖެހޭ ކަންކަން ނުބަލައި ތިއްބާ ބޮމުގެ ހަމަލާގެ އިތުރު އިންޒާރު މިސްކިތް މެދުވެރިކޮށް ދިން ކަމީ ނުހަނު ކަންބޮޑުވާ ކަމެއް ކަމަށެވެ. އަދި މިކަމަކީ އެއްވެސް ހާޅެއްގައި ސީރިއަސްކަން ކުޑަކޮށް ދޫކޮށްލެވޭ ވަރުގެ ކަންކަން ނޫން ކަމަށާއި ސަރުކާރުން މިފަދަ މައްސަލަތަކުގައި ދޭންޖެހޭ މިންވަރަށް ސަމާލުކަން ދޭތަން ނުފެންނަ ކަމަށްވެސް އިންތި ވިދާޅުވި އެވެ.
މީގެ އިތުރުން މިފަދަ ޓެރަރިޒަމްގެ މައްސަލަތަކާއި މަރުގެ މައްސަލަތަކަށް ސަރުކާރުން އިތުރަށް ސަމާލުވެ ފިޔަވަޅު އަޅަންޖެހޭ ކަމަށް އިންތި ވަނީ ވިދާޅުވެފަ އެވެ.
ނޫރު މިސްކިތުގެ ތަނބެއްގައި ލިޔެ، ރާއްޖެ ސުންނާފަތިކޮށްލާނެ ކަމުގެ އިންޒާރު ދިނުމާއި ގުޅިގެން އެމްޑީޕީން މީގެ ކުރިން ނެރުނު ބަޔާނެއްގައި ވަނީ ރާއްޖޭގައި ކުއްލި ނުރައްކަލުގެ ހާލަތު އިއުލާންކޮށް ހައްޔަރުކުރަންޖެހޭ މީހުން ހައްޔަރު ކުރުމަށާއި، ސަލާމަތީ ބާރުތަކުން އަޅަންޖެހޭ ފިޔަވަޅުތައް އެޅުމަށް ގޮވާލައިފަ އެވެ.
ބޮން ގޮއްވާނެ ކަމަށް ބުނި މައްސަލަ ފުލުހުން ބަލަމުން ދިޔަނަމަވެސް މިމައްސަލައިގައި އިތުރު ކުރިއެރުމެއް ހޯދިފައެއް ނުވެ އެވެ.
