ގަވާއިދާ ހިލާފަށް ރާއްޖޭގެ ކަނޑުގެ ސަރަހައްދަށް ވަދެ އުޅުނު ދެ ބޯޓްގައި ތިބީ 14 ބިދޭސީން ކަމަށް މޯލްޑިވްސް އިމިގްރޭޝަނުން ބުނެފިއެވެ.
އިމިގްރޭޝަނުން ބުނީ މިމަހުގެ އެގާރަ ވަނަ ދުވަހު ރާއްޖޭގެ އީއީޒެޑް ގެ ތެރެއަށް ގަވައިދާ ހިލާފަށް ވަދެ އުޅުނު ބޭރުގެ ދެ މަސްބޯޓުގައި ތިބި ބިދޭސީންގެ ޝަހުސު ޔަގީން ކުރުމުގެ މަސައްކަތް މިއަދު ވަނީ ކުރިއަށް ގެންގޮސްފައި ކަމަށެވެ. އަދި މި ދެ މަސް ބޯޓުގައި ޖުމުލަ 14 ބިދޭސީން ތިބި ކަމަށް އިމިގްރޭޝަނުން ހާމަކުރެއެވެ.
ރާއްޖޭގެ ހާއްސަ އިގްތިސާދީ ކަނޑުގެ ސަރަހައްދަށް ގަވާއިދާ ހިލާފަށް ވަދެ އުޅުނު ބޭރުގެ ދެ މަސް ބޯޓެއް އެމްއެންޑީއެފް ކޯސްޓްގާޑުގެ ބެލުމުގެ ދަށަށް ގެންދިޔައީ މިމަހުގެ އެގާރަ ވަނަ ދުވަހުއެވެ. މި މަސް ބޯޓުތައް ހޯދުމަށް އެމްއެންޑީއެފް ކޯސްޓްގާޑުން ކުރިއަށްގެންދިޔަ ހާއްސަ އޮޕަރޭޝަންގައި، އެ ސަރަހައްދުގައި މަސްވެރިކަން ކުރަމުންދިޔަ "އަސުރުމާ 3" ދޯނީގެ ފަރާތުން އެމްއެންޑީއެފް ކޯސްޓްގާޑަށް ވަރަށް ބޮޑު އެހީތެރިކަމެއް ލިބުނު ކަމަށް އެމްއެންޑީއެފުން ހާމަކުރެއެވެ.
