ހުޅުމާލެ ދެ ފޭސް ދެމެދުގައި ހަދާ ޗެނަލްގެ މަސައްކަތުގެ 66 އިންސައްތަ ނިންމާލައިފަވާ ކަމަށް ހައުސިން ޑިވޮލޮޕްމަންޓް ކޯޕަރޭޝަން އެޗްޑީސީން ހާމަކޮށްފިއެވެ.
އެޗްޑީސީން ބުނީ މި ޗެނަލަކީ 50 މީޓާރު ފުޅާ، 1.85 މީޓަރުގެ ފުންމިން ހުންނަ ހަތަރު ބްރިޖަކުން ހުޅުމާލެ ފޭސް އެކަކާއި އަދި ފޭސް ދެއެއް ގުޅުވާލަދޭ ޗެނަލްއެއް ކަމަށެވެ. އަދި މި ޗެނަލުން ފެން ދައުރުވާ ގޮތަށް ހަދާ އިރު މިކަމުގެ ސަބަބުން އެ ސަރަހައްދު ގިރުމުން ކޮންމެވެސް ވަރެއްގެ ރައްކާތެރިކަމެއް ލިބޭނެ ކަމަށް އެޗްޑީސީން ވަނީ ހާމަކޮށްފައެވެ.
މިމަސައްކަތް ނިމޭނެ ކަމަށް ލަފާ ކޮށްފައިވަނީ 2022 ވަނަ އަހަރުގެ ޖެނުއަރީ މަހަށެވެ. މިހާރު ކުރިޔަށް ދަނީ ބިންގަޑު އެއްވަރު ކުރުމުގެ މަސައްކަތާއިި، ގަލުގެ މަސައްކަތް އަދި ޗެނަލް ސަރަހައްދުގެ ވަށައިގެން ފާރު ރޭނުމުގެ މަސައްކަތާއި، އެ ސަރަހައްދުގެ ފެނުގައި ހުރި ކުނިބުނި ނަގައި ފެން ސާފު ކުރުމުގެ މަސައްކަތް ކަމަށް އެޗްޑީސީން ބުނެފައިވެއެވެ.
މީގެ އިތުރުންވެސް އެ ޗަނަލް ކޮނުމުގެ މަސައްކަތްވެސް މިހާރު ވަނީ ފަށާފައެވެ.
