ސިވިލް ސާރވެންޓް އެސޯސިއޭޝަންގެ އިހުތިޖާޖުގައި ބައިވެރިނުވާން ސިވިލް ސާރވިސް ކޮމިޝަނުން އަންގައިފިއެވެ.
ސިވިލް ސާރވިސް މުވައްޒަފުންގެ މުސާރަޔާ އިނާޔަތްތަކާއި ގުޅުވައިގެން ހުރި ކަންބޮޑުވުންތަކާއި ގުޅިގެން ސޯޝަލް މީޑިއާގައި ފާޅުކުރަމުންދާ ޝުއޫރުތަކާއި، މިކަމާ ގުޅިގެން އިހުތިޖާޖު ކުރުމުގެ ގޮތުން ބައެއް މުވައްޒަފުން މަސައްކަތް ހުއްޓާލައި ސޯޝަލް މީޑިއާގައި ހާމަކުރަމުންދާ ޝުއޫރުތަކާއި ގުޅިގެން ސީއެސްސީން ނެރެފައިވާ ނޫސްބަޔާނެއްގައި ބުނެފައިވަނީ، ސިވިލް ސާރވިސް ކޮމިޝަނުން އަބަދުވެސް މަސައްކަތް ކުރަމުންދަނީ ސިވިލް ސާރވިސް މުވައްޒަފުންގެ އަޑުއަހައި މުވައްޒަފުންނާއި ގާތުން މަސައްކަތްކޮށް، މުވައްޒަފުންގެ ހައްގުތައް ރައްކަތެރިކޮށްދީ، ދިވެހި ސިވިލް ސާރވިސްގެ ގާނޫނުން ކޮމިޝަނަށް މަތިކޮށްފައިވާ މަސްއޫލިއްޔަތުތައް އަދާ ކުރުމަށް ކަމަށެވެ. އެގޮތުން ސިވިލް ސާރވިސް މުވައްޒަފުންގެ ކަންބޮޑުވުންތަކާއި މުވައްޒަފުންނަށް ދިމާވެފައިވާ މައްސަލަތައް ހައްލު ކުރުމަށް ސަރުކާރުގެ ކަމާބެހޭ އިދާރާތަކާއި ގުޅިގެން އަބަދުވެސް ކޮމިޝަނުން ދަނީ މަސައްކަތް ކުރަމުން ކަމަށް ބުނެފައިވެއެވެ.
އަދި ސިވިލް ސާރވިސް މުވައްޒަފުންގެ ކަންބޮޑުވުންތައް ދެނެގަނެ ގާނޫނާއި ގަވައިދުގެ ތެރެއިން މައްސަލަތަކަށް ހައްލު ހޯދުމަށް އަޅަންޖެހޭ ފިޔަވަޅުތައްވެސް ދަނީ އަޅަމުން ކަމަށް ސީއެސްސީގެ ބަޔާނުގައި ބުނެފައިވެއެވެ. މީގެ އިތުރުން ދިވެހި ސިވިލް ސާރވަންޓްސް އެސޯސިއޭޝަންގެ ނަމުގައި މީސް މީޑިއާގައި މިހާރު ހަރަކާތްތެރިވާ ފަރާތަކީ ގަވައިދުން ރަޖިސްޓްރީވެސް ކޮށްފައިވާ ޖަމިއްޔާއެއް ނޫން ކަމަށާއި މިފަދައިން ވަކި ބަޔަކު ނޭންގޭގޮތަށް އެފަދަ ފަރާތްތައް ހިންގާ ހަރަކާތްތަކާއި ދެމުންގެންދާ އިރުޝާދުތަކާއި އެއްގޮތަށް ސިވިލް ސާރވިސް މުވައްޒަފުން އަމަލު ނުކުރުމަށްވެސް ވަނީ އިލްތިމާސްކޮށްފައެވެ.
