ރައީސް އިބްރާހިމް މުހައްމަދު ސޯލިހު، މިއަހަރުގެ އދ. އާންމު މަޖިލީހުގައި ތަގުރީރު ކުރައްވަން ހަމަޖެހިފައިވާއިރު، އެ ތަގުރީރު ޕްރޮމޯޓު ކުރުމަށް ރާއްޖޭގެ މީޑިއާތަކަށް ފައިސާ ދޭން ފަށައިފި އެވެ.
އެގޮތުން މައުލޫމާތު ލިބޭ ގޮތުގައި މިމަސައްކަތް ކުރަމުން ދަނީ ހާއްސަ އިންތިޒާމެއްގެ ދަށުން ރައީސް އޮފީހުންނެވެ. ސީދާ އަގުތަކާއި އިންތިޒާމުތައް ހާމަ ނުކުރިނަމަވެސް ރައީސް އޮފީހުން ބުނީ މިއަހަރުގެ އދ ގެ އާންމު މަޖިލީހަކީ މުޅި ދިވެހިރާއްޖެއަށް ފަހުރުވެރި އަހަރަކަށް ވާތީ ރާއްޖޭގެ މީޑިއާތަކާއި ގުޅިގެން އެކަން ފާހަގަކުރަން އެ އޮފީހުން ތައްޔާރުވަމުން ދާކަމަށެވެ.
މިއަހަރަކީ މުޅިން އަލަށް ދިވެއްސަކު އދ ގެ އާންމު މަޖިލީހުގެ ރިޔާސަތާއި ހަވާލުވި އަހަރެވެ. ރާއްޖޭގެ ފޮރިން މިނިސްޓަރު އަބްދުﷲ ޝާހިދު ރިޔާސަތާއި ހަވާލުވެވަޑައިގެންނެވުމާއި ގުޅިގެން އެ މަޖިލީހުގައި ރައީސް ސޯލިހު ތަގުރީރު ކުރައްވަން މިހާރު ވަޑައިގެން ހުންނެވީ އެމެރިކާގަ އެވެ.
ރައީސް ސޯލިހު އދ ގެ އާންމު މަޖިލީހުގައި އިނގިރޭސި ބަހުން ތަގުރީރު ނުކުރައްވަންވެސް ވަނީ ނިންމަވައިފަ އެވެ. އެހެންކަމުން ރައީސް ތަގުރީރު ކުރައްވާނީ ދިވެހި ބަހުންނެވެ.
މައުލޫމާތު ލިބިފައިވާ ގޮތުގައި ރައީސް ސޯލިހުގެ ތަގުރީރު ޕްރޮމޯޓު ކުރުމުގެ ގޮތުން ބޮޑެތި ބައެއް ޓީވީތަކާއި ނޫސްތަކަށް 100،000 ރުފިޔާ ވަނީ ރައީސް އޮފީހުން ހުށަހަޅައިފަ އެވެ. އަދި އެހެން ބައެއް ކުދި މީޑިއާތަކަށް 75،000 ރުފިޔާ އާއި 50،000 ރުފިޔާވެސް ވަނީ ހުށަހަޅައިފަ އެވެ.
މީގެ ކުރިންވެސް ރާއްޖޭގެ ރައީސުން އދ ފަދަ ބޮޑެތި މަޖިލިސްތަކުގައި ތަގުރީރު ކުރެއްވި އެވެ. އެފަދަ ބޮޑެތި ހަރަކާތްތައް އަބަދުވެސް މީޑިއާތަކުން ގެނަސްދެ އެވެ. ހާއްސަކޮށް ކޮންމެ މުނާސަބަތެއްގައިވިޔަސް ރައީސަކު ތަގުރީރެއް ދެއްވާނަމަ ބޮޑެތި އަދި ކުދި މީޑިއާތަކުންވެސް އެވާހަކަ ގެނަސްދެ އެވެ. ގިނަ މީޑިއާތަކުގައި އެ ހަބަރުތައް ފީޗާވެސް ކުރެ އެވެ. އެހެންނަމަވެސް މީގެ ކުރިން މިފަދަ ކަންކަމަށް ބޮޑެތި އަދަދުތަކުން ފައިސާ ހޭދަކޮށްފައި ނުވާކަން ފާހަގަކޮށްލެވެ އެވެ.
