ރައީސް އިބްރާހިމް މުހައްމަދު ސޯލިހު، އެމްއެމްޕީއާރުސީ ބޮޑު ހިޔާނާތުގެ ފައިސާ ނެންގެވިކަމަށް އެމްޑީޕީގެ ކުރީގެ ޗެއާޕާސަން އަދި މި ސަރުކާރުގެ އެންމެ ފުރަތަމަ ޓޫރިޒަމް މިނިސްޓަރު އަލީ ވަހީދު ވިދާޅުވުމުން އެކަން ތަހުގީގުކުރެއްވުމަށް ގޮވާލައި ރައްޔިތުންގެ މަޖިލީހަށް ހުށަހެޅި މައްސަލަ ބަލައިނުގަނެ ބޭރުކޮށްލައިފި އެވެ.
މީގެ ކުރިންވެސް ރައީސް ސޯލިހަށް އެމްއެމްޕީއާރުސީ ފައިސާއިން މަންފާ ނެންގެވިކަމުގެ ތުހުމަތު ކުރެވިފައި އޮއްވައި އަލީ ވަހީދު ރޭ ވިދާޅުވީ އެ ވީޑިއޯވެސް ތަހުގީގަށް ލިބުނު ކަމަށެވެ. އެހެންނަމަވެސް މިހާރުގެ ޑެޕިއުޓީ ކޮމިޝަނާ އޮފް ޕޮލިސް މުހައްމަދު ރިޔާޒު އިސްވެ ހުންނަވައި އެ ވީޑިއޯ ފުލުހުންގެ ރެކޯޑުން ފޮހެލެއްވިކަމަށް އަލީ ވިދާޅުވި އެވެ.
މިވާހަކަތަކާއި ގުޅިގެން އިދިކޮޅުން ވަނީ ރައީސް ސޯލިހުގެ މައްޗަށް ކުރެވޭ ސީރިއަސް ތުހުމަތުތައް މިނިވަންކަމާއިއެކު ދެފުށް ފެންނަ ގޮތަށް ތަހުގީގު ކުރެވެން ޖެހޭކަމަށް ވިދާޅުވެ މައްސަލައެއް ހުށަހަޅައިފަ އެވެ. އަދި ތަހުގީގު ވަކި ގޮތަކަށް ނިމެންދެން ރައީސް ސޯލިހު މަގާމުގެ މަސްއޫލިއްޔަތުތަކުން އެކަހެރިވެވަޑައިގަންނަވަންޖެހޭ ކަމަށްވެސް އިދިކޮޅުން ހުށަހެޅި ކުއްލި މައްސަލައިގައި ވަނީ ބުނެފަ އެވެ.
މިމައްސަލަ ބަލައިނުގަންނަން ނިންމީ ކޮން ސަބަބަކާއިހުރެކަން ސާފެއް ނުވެ އެވެ. އިދިކޮޅު ކޯލިޝަނުން މައްސަލަ ހުށަހެޅުއްވި މަޑުއްވަރީ ދާއިރާގެ މެމްބަރު އާދަމް ޝަރީފު އުމަރުވެސް ވިދާޅުވީ އެފަދައިންނެވެ.
އަލީ ވަހީދު ރޭ ވިދާޅުވި ގޮތުގައި ކުރީގެ ރައީސް އަބްދުﷲ ޔާމީންގެ މައްޗަށް އެމްއެމްޕީއާރުސީ ހިޔާނާތުގެ މައްސަލައެއްގައި ހުކުމް އިއްވާފައިވަނީ ކުށް ސާބިތުވެގެންނެއް ނޫނެވެ. މީގެ ކުރިން ބޭރުގެ ދެ ގައުމަކުންވެސް ރައީސް ޔާމީންއަށް ހިޔާނާތުގެ ފައިސާ ލިބުނުކަމުގެ ހެކި ނެތްކަމަށް ނިންމާފައިވާކަމަށް އަލީ ވަހީދު ވިދާޅުވި އެވެ.
އަލީ ވިދާޅުވީ ރައީސް ސޯލިހު ނެންގެވީ އޭރު އެމްޑީޕީގެ ޕީޖީ ލީޑަރުގެ ގޮތުގައި ހުންނަވައި، 35 މިލިއަން ރުފިޔާ އެވެ. އެފައިސާ ނެންގެވީ އޭރުގެ ނައިބު ރައީސް އަހުމަދު އަދީބު ދިރިއުޅުއްވި ރެހެންދި އެޕާޓްމެންޓަށް ވަޑައިގެން ކަޅު ދަބަހެއްގަ އެވެ. އެމްއެމްޕީއާރުސީ ހިޔާނާތުގެ ތަހުގީގަށް އެކި ފަރާތްތަކުން ދިން ބަޔާންތަކުގައި އެކަން ފާހަގަކޮށްފައިވާނެކަމަށްވެސް އަލީ ވިދާޅުވި އެވެ.
