ޑިމޮކްރަސީއެއް އޮތް ގައުމެއް ނަމަ ރައީސްގެ މައްޗަށް ޖިނާއީ ތަހުގީގު ހިންގަންޖެހޭ ކަމަށް ކުރީގެ ނައިބު ރައީސް ޑރ މުހައްމަދު ޖަމީލް އަހުމަދު ވިދާޅުވެއްޖެއެވެ.
މި ސަރުކާރުގެ އެންމެ ފުރަތަމަ ޓުއަރިޒަމް މިނިސްޓަރ އަލީ ވަހީދު އިނގިރޭސިވިލާތުގައި ހުންނަވައި ރޭ ނޫސްވެރިންނާއި ބައްދަލު ކުރައްވާ ވަނީ ރައީސުލްޖުމުހޫރިއްޔާ އިބްރާހިމް މުހައްމަދު ސާލިހު އެމްއެމްޕީއާރުސީގެ ރުފިޔާގައި ޖެހިފައިވާ ކަމަށާއި އެމަނިކުފާނު 35 މިލިޔަން ރުފިޔާއަށްވުރެ ގިނައިން ކަޅު ދަބަހެއްގައި އުފުލި ކަމަށް ވިދާޅުވެފައެވެ. އަދި މިކަމުގެ ހެކި ފުލުހުންގެ އަތުގައި ހުންނާނެ ކަމަށްވެސް އަލީ ވަހީދު ވިދާޅުވިއެވެ.
މިކަމަށް އިޝާރާތް ކުރައްވާ ޑރ ޖަމީލް ކުރެއްވި ޓުވީޓެއްގައި ވިދާޅުވީ، މި ސަރުކާރުން ޒީރޯ ޓޮލަރެންސޭ ވިދާޅުވީ އެމްއެމްޕީއާރުސީގެ ޖަރީމާގައި ދެ ބޯގެރި ދުއްވަންކަން ޔަގީންވެއްޖެ ކަމަށެވެ. އަދި ޑިމޮކްރަސީއެއް އޮތް ގައުމެއް ނަމަ ރައީސުލްޖުމުހޫރިއްޔާ އިބްރާހިމް މުހައްމަދު ސާލިހުގެ މައްޗަށް ޖިނާއީ ތަހުގީގު ހިންގަން މަޖުބޫރު ކަމަށެވެ. ގާނޫނު އަތް އޮތީ ކަނޑާލާ ގަތުލްކޮށްފައި ކަމަށާއި އިންސާފު އޮތީ ކަފުން ކޮށްފައި ކަމަށްވެސް ޖަމީލް ވިދާޅުވިއެވެ.
އަލީ ވަހީދު ވިދާޅުވީ ކުރީގެ ރައީސް ޔާމީންގެ މައްޗަށް ކޮށްފައިވާ ހުކުމަކީވެސް ރަނގަޅު ތަހުގީގެއްގެ މައްޗަށް ކޮށްފައިވާ ހުކުމެއް ނޫން ކަމަށެވެ.
