ގުޅުން ތަރައްގީ ކުރުމަށް ރާއްޖެއާ ބަންގްލަދޭޝް މަޝްވަރާކޮށްފި

ރައީސުލްޖުމްހޫރިއްޔާގެ ނައިބު ފައިޞަލް ނަސީމްގެ އަރިހަށް، ބަންގްލަދޭޝް ސަރުކާރުން ދިވެހިރާއްޖެއަށް ކަނޑައަޅުއްވާފައި ހުންނަވާ ސަފީރު، ރިއަރ އެޑްމިރަލް މުޙައްމަދު ނަޒްމުލް ޙަސަން، އިޚްތިރާމްގެ ޒިޔާރަތެއް ކުރައްވައިފި އެވެ.

މިބައްދަލުކުރެއްވުން ކުރިޔަށްގެންގޮސްފައި ވަނީ މިއަދު ހެނދުނު ރައީސުލްޖުމްހޫރިއްޔާގެ އޮފީހުގަ އެވެ.

މި ބައްދަލުކުރެއްވުމުގައި، މި އަހަރު ދިވެހިރާއްޖެއާއި ބަންގްލަދޭޝްއާ ދެމެދު ހާރިޖީ ގުޅުން ގާއިމުކުރެވުނުތާ 43 އަހަރު ފުރުމާއިގުޅިގެން، ދެބޭފުޅުންވެސް ވަނީ އެކަން ފާހަގަ ކުރައްވާފަ އެވެ. އަދި ދެޤައުމުގެ ގުޅުން އިތުރަށް ބަދަހި ކުރުމަށް ކުރެވެންހުރި މަސައްކަތްތަކުގެ މައްޗަށް އަލިއަޅުއްވާލައްވާ ދެބޭފުޅުންވެސް ފުޅާ ދާއިރާއެއްގައި މަޝްވަރާ ކުރެެއްވި އެވެ.

މި ބައްދަލުކުރެއްވުމުގައި ނައިބުރައީސް ވަނީ ދިވެހިރާއްޖޭގެ ތަރައްޤީއަށްޓަކައި އެކިއެކި ގޮތްގޮތުން ބަންގްލަދޭޝްގެ ފަރާތުން ވެދެއްވަމުން ގެންދަވާ އެހީތެރިކަން ފާހަގަކުރައްވާ އެކަމުގެ އަގުވަޒަންކުރައްވާ، އެކަމަށްޓަކައި ބަންގްލަދޭޝް ސަރުކާރަށް ޝުކުރު އަދާކުރައްވާފަ އެވެ. އެ މަނިކުފާނުގެ ވާހަކަފުޅުގައި، އިންސާނީ ވަަސީލަތް ތަރައްޤީކުރުމަށް ޓެކްނިކަލް އަދި ވޮކޭޝަނަލްގެ އެކި ރޮނގުރޮނގުން މީހުން ތަމްރީނު ކުރުމަށް ބަންގްލަދޭޝްގެ ފަރާތުން ރާއްޖެއަށް ވެދެއްވަމުން ގެންދަވާ އެހީތެރިކަން ޚާއްސަގޮތެއްގައި ފާހަގަކުރެއްވި އެވެ. އަދި ރާއްޖޭގައި މިހާރުވެސް ޚިދުމަތުގައި ތިބި ޑޮކްޓަރުންނާއި ސްޕެޝަލިސްޓުން މަދުކަން ފާހަގަކުރައްވާފައި ވެއެވެ.

މީގެ އިތުރުން ފައިސަލް ނަސީމްގެ ވާހަކަފުޅުގައި، ކޮވިޑް-19 ގެ ހާލަތުގައި ބަންގްލަދޭޝް ސަރުކާރުން ރާއްޖެއާއެކު ބޭއްވެވި ގާތް ރަހްމަތްތެރިކަމަށްޓަކައި، ބަންގްލަދޭޝް ސަރުކާރަށް ޝުކުރުއަދާކުރެއްވި އެވެ. އެގޮތުން ބަންގްލަދޭޝްއަށް ކިޔަވަން ގޮސްތިބި ކުދިންނަށް އެހާލަތުގައި ދިމާވި ދަތިތައް ހައްލުކުރުމަށް ދިވެހި ސަރުކާރާއެކު ކުރެއްވި މަސައްކަތަށް ތައުރީފުކުރެއްވި އެވެ.

މި ބައްދަލުކުރެއްވުމުގައި، ބަންގްލަދޭޝް ސަފީރު ދެއްކެވި ވާހަކަފުޅުގައި، ރާއްޖޭގައި މަސައްކަތްކުރާ ބިދޭސީން އާބާދީގެ ބޮޑު ބައެއް ހިއްސާކުރަނީ ބަންގްލަދޭޝްގެ ރައްޔިތުންކަން ފާހަގަކުރައްވާފައިވެ  އެވެ. އަދި އެގޮތުން ރާއްޖޭގައި މަސައްކަތްކުރާ އެ ފަރާތްތަކަށް ކުރިމަތިވެފައިވާ އަދި ކުރިމަތިވަމުންދާ އެކިއެކި މައްސަލަތަކުގެ މައްޗަށް ފުޅާ ދާއިރާއެއްގައި ވާހަކަފުޅުދައްކަވާފައިވެ އެވެ.

މި ދެ ބޭފުޅުންގެ ވާހަކަފުޅުގައި، ދެ ޤައުމުގެ ދެމެދުގައި އޮތް ގާތް ރަޙުމަތްތެރި ގުޅުން އިތުރު ހަރުފަތަކަށް ގެންދިއުމަށް ޝައުޤުވެރިކަން ފާޅުކުރައްވައި، ދޭދޭ ގުޅުންތައް އިތުރަށް ހަރުދަނާ ކުރެވިދާނެ ގޮތްތަކުގެ މައްޗަށް އަލިއަޅުއްވާލެއްވި އެވެ.