ރާއްޖޭގައި ވަޒީފާ އަދާކުރާ މީހުންނަށް ދެވޭނެ އެންމެ ކުޑަ އުޖޫރަ ކަނޑައަޅަން ބާއްވަން ތާވަލުކުރި ބޯޑު ބައްދަލުވުން އަނެއްކާވެސް ފަސްކޮށްފި އެވެ.
އެންމެ ކުޑަ އުޖޫރަ ނުވަތަ މިނިމަމް ވޭޖު ކަނޑައެޅުމުގެ މަސައްކަތް މީގެ ކުރިންވެސް ސަރުކާރުން ކުރަމުން ދިޔަ އެވެ. މަސައްކަތް ފެށިތާ ދެ އަހަރެއްހާ ދުވަސް ވެފައިވާއިރު އަދިވެސް އުޖޫރަ ކަނޑައެޅޭގޮތް ވަނީ ނުވެފަ އެވެ.
ފަސްކުރި ބޯޑު ބައްދަލުވުން ބާއްވަން މީގެ ކުރިން ތާވަލުކޮށްފައި އޮތީ މިއަދަށެވެ. އެހެންނަމަވެސް މިހާރު އެ ބައްދަލުވުން ވަނީ މާދަމާއަށް ފަސްކޮށްފަ އެވެ. ބައްދަލުވުން ބާއްވާނީ މާދަމާ މެންދުރުފަހު 2:00 ގައި ކަމަށް މައުލޫމާތު ލިބެ އެވެ.
މިއަދު ބާއްވަން އުޅުނު ބައްދަލުވުން ފަސްކުރަން ނިންމީ ކީއްވެގެން ކަމެއް މިނިސްޓްރީން ހާމައެއް ނުކުރެ އެވެ.
ވޭޖު ބޯޑުގެ މަސައްކަތްތައް ލަސްވުމުގެ ސަބަބުން އެންމެ ކުޑަ އުޖޫރަ ކަނޑަނޭޅި އޮތީކަމަށް މީގެ ކުރިން މިނިސްޓަރު ފައްޔާޒު އިސްމާއިލް ވިދާޅުވި އެވެ. މިނިމަމް ވޭޖު ނުވަތަ އެންމެ ކުޑަ އުޖޫރަ ކަނޑައެޅުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެކެވެ.
ވަޒީފާއާ ބެހޭ ގާނޫނުގައިވާ ގޮތުން އެންމެ ކުޑަ އުޖޫރަ ކަނޑައަޅަން ޖެހޭނީ ވޭޖް ބޯޑުން ދޭ ލަފާގެ މަތިން އިކޮނޮމިކް މިނިސްޓަރެވެ. އެގޮތުން ވޭޖް ބޯޑު އެގާރަ މެންބަރުންގެ މައްޗަށް އެކުލަވާލާފައިވަނި ވަޒީފާ ދޭ ފަރާތްތަކާއި މަސައްކަތްތެރިން ޝާމިލްވާ ގޮތަށެވެ.
މިނިމަމް ވޭޖު ކަނޑައެޅުމާއި ގުޅޭގޮތުން މީގެ ކުރިން ސަރުކާރުން ބުނެފައިވަނީ އެކަން ކުރާނީ ފޭސްތަކަކަށް ބަހާލައިގެންނެވެ. އަދި މިނިމަމް ވޭޖު ކަނޑައަޅާނީ ދާއިރާތަކަކަށް ބަހާލައިގެން ކަމަށްވާއިރު އޭގެ ތެރޭގައި މަސްވެރިކަން، ދަނޑުވެރިކަން، ފަތުރުވެރިކަން، ކޮންސްޓްރަކްޝަން، ދަތުރުފަތުރު، ސިއްހީ ދާއިރާ، ތައުލީމީ ދާއިރާ، ކުދި އަދި މެދު ފަންތީގެ ވިޔަފާރިތަކުގެ އިތުރުން އިންފޮމޭޝަން ޓެކްނޮލީއާއި މެރިޓައިމް ވިޔަފާރިފަދަ ދާއިރާތައް ވަނީ ވަކިކޮށްފަ އެވެ.
އެންމެ ކުޑަ އުޖޫރައިގެ ގޮތުގައި ކަނޑައަޅަނ މީގެ ކުރިން ލަފާ ދީފައިވަނީ 6،400 އާއި 8،000 ރުފިޔާ އާއި ދެމެދުގެ އަދަދެކެވެ. އެކި ސިނާއަތްތަކުގައި މި އަދަދު ތަފާތުވާނެ އެވެ. ފުރަތަމަ މިކަން ތަންފީޒު ކުރާއިރު ބިދޭސީ މަސައްކަތްތެރިން އޭގެ ތެރޭގައި ނުހިމެނޭނެ އެވެ.
