އދ. ގެ އާންމު މަޖިލީހުގެ 76 ވަނަ ސެޝަންގައި ބައިވެރިވެވަޑައިގެންނެވުމަށް ރައީސް އިބްރާހިމް މުހައްމަދު ސޯލިހުގެ ދެކަނބަލުން އެމެރިކާގެ ނިއުޔޯކަށް ކުރެއްވި ދަތުރުފުޅު ނިންމަވާލައްވައި ރާއްޖެ ވަޑައިގެންފި އެވެ.
މިމަހުގެ 18 ވަަނަ ދުވަހު ފެއްޓެވި ދަތުރުފުޅަށްފަހު ރައީސްގެ ދެކަނބަލުން ރާއްޖެ ވަޑައިގެންނެވީ މިއަދު ހެނދުނެވެ. މި ދަތުރުފުޅުގައި އެ ދެކަނބަލުންގެ އިތުރުންވެސް ސަރުކާރުގެ އެހެން ބައެއް އިސް ވެރިން ބައިވެރިވެވަޑައިގެންނެވި އެވެ.
އދ. ގެ އާންމު މަޖިލީހުގައި ބައިވެރިވެވަޑައިގެން، މިދިޔަ ހަފްތާގެ އަންގާރަ ދުވަހު ރައީސް ވަނީ އެ މަޖިލީހުގައި ދިވެހި ބަހުން ތަގުރީރު ކުރައްވާފަ އެވެ.
އެ ތަގުރީރުގައި ދިވެހި ބަހުން ވާހަކަ ދެއްކެވުމަކީ، ބައިނަލްއަގުވާމީ މަސްރަހުގައި ރާއްޖެއަށް ބަސްބުނުމުގެ ގާބިލިއްޔަތު ލިބިގެންވޭތޯ އާއި ރާއްޖެއަކީ އެކަމަށް ކުފޫ ހަމަވާ ގައުމެއްތޯ ބައިނަލްއަގުވާމީ މައިދާނުގައި ކުރެވޭ ސުވާލުގެ ޖަވާބު ކަމަށް ރައީސް ވިދާޅުވި އެވެ. މިއީ ދިވެހި ބަހުން އދ. ގެ އާންމު މަޖިލީހެއްގައި ތަގުރީރު ކުރެއްވި ދެވަނަ ރައީސެވެ.
އެމަނިކުފާނުގެ ތަގުރީރުގައި ފަލަސްތީނުގެ މިނިވަން ދައުލަތަކަށް ވަކާލާތުކުރައްވައި، ދުނިޔެއަށް ކުރިމަތުވެފައިވާ ޓެރަރިޒަމްގެ މައްސަލަ އާއި މޫސުމަށް އަންނަ ބަދަލުތަކާ ބެހޭ ގޮތުން ވާހަކަދެއްކެވި އެވެ.
ރައީސްގެ ދަތުރުފުޅުގައި ބައެއް ގައުމުތަކުގެ ލީޑަރުންނާ މަޝްވަރާ ބައްދަލުވުންތައް ބޭއްވެވި އެވެ. އޭގެ ތެރޭގައި ކުވޭތުގެ ބޮޑުވަޒީރު ޝައިހް ސަބާހް ހާލިދު އަލް ހަމަދް އަލް ސަބާހު އާއި ބަންގްލަދޭޝްގެ ބޮޑުވަޒީރު ޝެއިހް ހަސީނާ ހިމެނެ އެވެ.
