މިދުވަސްވަރު މާލެ ސަރަހައްދުން އަރިދަފުސް ރޯގާ ޖެހިގެން ރިޕޯޓްކުރާ އަދަދު އިތުރުވަމުން އަންނާތީ ރައްކާތެރިވެ އުޅުމަށް ހެލްތް ޕްރޮޓެކްޝަން އެޖެންސީން އިލްތިމާސްކޮށްފިއެވެ.
އެޗްޕީއޭއިން ބުނީ ސެޕްޓެމްބަރު މަސް ތެރޭގައި އަރިދަފުސް ރޯގާ ޖެހިގެން 3720 ކޭސް ވަނީ ރިޕޯޓްކޮށްފައި ކަމަށެވެ. މިއީ ފާއިތުވި އޮގަސްޓްމަހާއި އަޅާ ބަލާއިރު 60 އިންސައްތަ އިތުރު އަދަދެއް ކަމަށާއި އަރިދަފުސް ރޯގާގެ އިތުރުން ފާއިތުވެދިޔަ މަސްތަކުގައި ރިޕޯޓްކޮށްފައިވާ އަދަދުތަކާއި އަޅާ ބަލާއިރު، އިންފްލުއެންޒާ އަށް ޕޮޒިޓިވްވާ އަދަދުވެސް ގިނަ ވެފައިވާކަން ފާހަގަކުރެވިފައި ކަމަށް އެޗްޕީއޭއިން ހާމަކުރެއެވެ.
އަދި މިމަހުގެ ތެރޭގައި އިންފްލުއެންޒާ އަށް ޓެސްޓް ކުރެވުނު 209 ސާމްޕަލްގެ ތެރެއިން 68 ސާމްޕަލް އިންފްލުއެންޒާ އޭ އަށް ވަނީ ޕޮޒިޓިވްވެފައި ކަމަށްވެސް އެ އިދާރާއިން ނެރުނު ބަޔާނުގައި ވަނީ ފާހަގަކޮށްފައެވެ.
މާލެ ސަރަހައްދުގައި އިންފްލުއެންޒާ އާއި އަރިދަފުސްރޯގާ އިތުރުވަމުން އަންނާތީ މިފަދަ ބަލިތަކުން ރައްކާތެރިވުމަށްޓަކައި މި ދުވަސްވަރު ހާއްސަ ސަމާލުކަމެއް ދިނުމަށް އެޗްޕީއޭއިން ވަނީ އިލްތިމާސްކޮށްފައެވެ.
