ރާއްޖޭގައި އެންމެ ބޮޑަށް އިސްކަން ދޭން ޖެހޭ އެއް ކަމަކީ ނޫސްވެރިކަމުގެ މިނިވަންކަން ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވެފައި މިވަނީ، ހެއްކާއި ބެހޭ ބިލުގައި މަސްދަރު ހާމަކުރަން ޖެހޭގޮތަށް އޮތް މާއްދާ ހިމަނައިގެން ބިލު ފާސްކޮށްފި ނަމަ، އެކަމުގެ ސަބަބުން ނޫސްވެރިކަމުގެ ހައްގުތަކަށް އުނިކަން އަންނާނެ ކަމަށް ބުނެ ގިނަ ބަޔަކު އަންނަނީ މިކަމާ ނުރުހުން ފާޅު ކުރަމުންދާ ދަނޑިވަޅެއްގައެވެ. ނަޝީދު ކުރެއްވި ޓުވީޓެއްގައި ވިދާޅުވީ، ހެއްކާ ބެހޭ ބިލުގައި މަސްދަރު ބައެއް ހާލަތުގައި ހާމަކުރަން ޖެހޭ ގޮތަށް ހިމެނާފައިވަނީ އޮސްޓްރޭލިއާގައި އަމަލުކުރާ އުސޫލަށް ރިއާޔަތްކޮށްފައި ކަމަށެވެ.
ރައީސް ނަޝީދުގެ ޓުވީޓްގައި ހެއްކާ ބެހޭ ބިލުގެ މަސްދަރުގެ މައްސަލައިގައި ގިނަ ޖަމިއްޔާތަކުން ކަންބޮޑުވުން ފާޅުކޮށް ނެރުނު ބަޔާންތަކުގައި ބުނީ ސަރުކާރުން މިހާރު ހުށަހަޅާފައިވާ ގޮތަށް ހެއްކާ ބިލު ފާސްވެ ގާނޫނަކަށް ވެގެން ހިނގައްޖެނަމަ އެކަމުގެ ސަބަބުން ނޫސްވެރިން ބޭނުންކުރާ މަސްދަރުތައް ގެއްލި، ކޯޓުތަކުގައި މަސްދަރު ހާމަކޮށްފާނެ ކަމުގެ ބިރަށް ގިނަ މަސްދަރުތަކުން މައުލޫމާތު ނުދިނުން ފަދަ މައްސަލަތައް ދިމާވެދާނެ ކަމަށެވެ.
މި ބިލާއިމެދު ކަންބޮޑުވުން ފާޅުކޮށް އެމްއެމްސީން އިތުރަށް ބުނީ ނޫސްވެރިކަަމުގެ ކުރިއެރުމަށް ހުރަސްއެޅިދާނެ އެއްވެސް ކަމެއް ކުރުމަކީ ޕްރެސް ފްރީޑަމް އިންޑެކްސްގައި ރާއްޖެ ހޯދަމުންދާ ކުރިއެރުންތައް ހުއްޓިދާނެ އަދި އެކަން މުޅި ދުނިޔޭގެ ސަމާލުކަމަށް އައިސް ބައިނަލްއަގުވާމީ އެތައް ގޮންޖެހުންތަކެއް ކުރިމަތިވެދާނެ ކަމެއް ކަމަށެވެ.
