ބައިނަލްއަގުވާމީ އިސްރަށްވެހިންގެ ދުވަސް ފާހަގަކުރުމުގެ ގޮތުން ހައުސިންގް ޑިވެލޮޕްމެންޓް ކޯޕަރޭޝަން (އެޗްޑީސީ) އިން އިސް ނަގައިގެން ހާއްސަ ހަރަކާތްތަކެއް ބާއްވަން ނިންމައިފި އެވެ.
އިސްރަށްވެހިންގެ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ އޮކްޓޯބަރު މަހުގެ 2 ވަނަ ދުވަހެވެ.
މިއަހަރު މިދުވަސް ރާއްޖޭގައި ފާހަގަކުރަނީ އެޗްޑީސީއާއި، ދިރާގުގެ އިތުރުން ކޮމިއުނިޓީ ނާސް ވޮލެންޓިއާޒް ގުޅިގެންނެވެ.
އެޗްޑީސީން ބުނީ އެދުވަހުގެ މުނާސަބަތުގައި ރަހުމަތްތެރިންގެ ގުރޫޕުތަކާއެކު ބައިވެރިވެވޭ ބޯޑު ގޭމްފަދަ ކުޅިވަރުތައް ބާއްވާނެ ކަމަށެވެ. އަދި ދުޅަހެޔޮ ސިއްހަތެއްގައި ދެމިތިބުމުގެ މުހިންމުކަން އަންގައިދޭ މައުލޫމާތު ފޯރުކޮށްދިނުމާއި، ހަކުރާއި، ލޭގެ ޕްރެޝަރު ބެލުމުގެ ކަންކަންވެސް އެދުވަހު ކުރިއަށް ގެންދާން ވަނީ ނިންމައިފަ އެވެ.
އިސްރަށްވެހިންގެ ދުވަހުގެ ހަރަކާތްތައް ކުރިއަށް ގެންދާނީ އެޗްޕީއޭގެ ގައިޑްލައިންތަކާއި އެއްގޮތަށެވެ.
ހަރަކާތްތަކުގައި ބައިވެރިވުމުގެ ފުރުސަތު މިހާރު ވަނީ ހުޅުވާލައިފަ އެވެ. އެގޮތުން އުމުރުން 65 އަހަރުން މަތީގެ މީހުންނާއި ގްރޫޕުތަކަށްވެސް މިހާރު ރަޖިސްޓްރީ ވެވޭނެ އެވެ. ރަޖިސްޓްރީ ވާން ގުޅަން ޖެހެނީ 7924392 އަށެވެ.
ދުވަހުގެ ހަރަކާތްތައް ހެނދުނު 6:30 އިން ރޭގަނޑު 8:30 އާއި ހަމައަށް އެކި ވަގުތުތަކުގައި ކުރިއަށް ގެންދާނެ އެވެ. ހަރަކާތްތައް ބާއްވަނީ ހުޅުމާލެ ރުއްގަނޑު ސަރަހައްދުގަ އެވެ.
