ރައްޔިތުންގެ މަޖިލީހުގެ މެމްބަރުންގެ ރައްޓެހިންނަށް އެއަރޕޯޓް ވީއައިޕީ ލައުންޖް ބޭނުން ކުރެވޭ ގޮތް ހަދަން ތާއީދެއް ނުކުރައްވާ ކަމަށް މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު ވިދާޅުވެއްޖެއެވެ.
މެމްބަރު އާދަމް ޝަރީފް ކުރެއްވި ޓުވީޓެއްގައި ވިދާޅުވީ، ނުހައްގު ބާރުތައް ބޭނުން ކުރުމަކީ ތަހުޒީބުކަމެއް ކަމަށް ދެކެވަޑައި ނުގަންނަވާ ކަމަށާއި ގަވައިދު ބަދަލު ކުރާނެ ކަމަށް އުއްމީދު ކުރައްވާ ކަމަށެވެ.
ރައްޔިތުންގެ މަޖިލީހުގެ މެންބަރުންނާއި މެންބަރުންގެ އާއިލާތަކުގެ އިތުރަށް އެ މެންބަރުންގެ އެކުވެރިންނަށްވެސް ވެލާނާ އިންޓަނޭޝަނަލް އެއާޕޯޓުގެ ވީއައިޕީ ލައުންޖު ބޭނުންކުރެވޭ ގޮތަށް މަޖިލީހުގެ އާންމު ކޮމިޓީން ފާސްކުރީ އިއްޔެއެވެ. މި މައްސަލައާ ގުޅޭ ގޮތުން ރައްޔިތުންގެ މަޖިލީހުގެ އާންމު ކޮމިޓީގެ ބައްދަލުވުމެއް ބާއްވާފައިވަނީ ބުދަ ދުވަހުއެވެ. ނަމަވެސް މިބައްދަލުވުން ބޭއްވީ ސިއްރުންނެވެ.
އޮންލައިން ނޫސް "ދިޔަރެސް"އަށް މައުލޫމާތު ދެއްވި އެމްޑީޕީގެ މެމްބަރަކު ވިދާޅުވި ކަމަށް އެނޫހުން ރިޕޯޓްކޮށްފައިވާ ގޮތުން ބުދަދުވަހު ސިއްރުކޮށްގެން ބޭއްވި ބައްދަލުވުމުގައި ނިންމާފައިވަނީ މެންބަރުންނާއި މެންބަރުންގެ އާއިލާގެ އިތުރަށް އެ މެންބަރަކު އިހުތިޔާރުކުރާ އިތުރު ދެ މީހަކަށްވެސް ލައުންޖު ބޭނުންކުރެވޭނެ ކަމަށެވެ. މި ކޮމިޓީގައި އެމްޑީޕީގެ 8 މެންބަރުން ހިމެނިވަޑައިގަންނަވައެވެ
