ހުޅުމާލޭގެ ދެވަނަ ފިޔަވަހީގައި ދިރިއުޅޭ ރައްޔިތުންނަށް މާދަމާ ބަހުގެ ހިދުމަތް ފަށަން ނިންމާފައިވާ ކަމަށް އެމްޓީސީސީން ހާމަކޮށްފިއެވެ.
އެމްޓީސީސީން ނެރުނު ޕްރެސް ރިލީޒެއްގައި ބުނެފައިވަނީ، ހުޅުމާލޭ ދެވަނަ ފިޔަވަހީގައި ދިރިއުޅޭ ރައްޔިތުންނަށް ދަތުރުފަތު ކުރުމުގައި މިހާރު ދިމާވަމުން އަންނަ ދަތިތަކަށް ހައްލު ހޯދައިދިނުމަށްޓަކައި ސަރުކާރުން މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން އާއި ހުޅުމާލެ ޑިވޮލޮޕްމަންޓް ކޯޕަރޭޝަން އެކު ކުރެވުނު މަޝްވަރާތަކަށްފަހު މާދަމާއިން ފެށިގެން ހުޅުމާލެ ދެވަނަ ފިޔަވައްސަށް ބަހުގެ ހިދުމަތް ފަށަން ނިންމާފައިވާ ކަމަށެވެ.
މިގޮތުން ހުޅުމާލެ ފުރަތަމަ ފިޔަވަހީގެ ރައްޔިތުންނަށްވެސް ދެވޭނެ ގޮތަށް މިހާރު ވަނީ ބަސްރޫޓަށް ބަދަލު ގެނެވިފައި ކަމަށާއި ހުޅުމާލެ ފޭސް 1 އަދި ފޭސް 2 އެއް ގުޅުވައިދޭ ބަސް ރޫޓުން ހުޅުމާލެ ފެރީ އާއި ގުޅުވައިދޭ ބަސް ހުއްޓިތަކަށް ހުއްޓާނެ ކަމަށް އެކުންފުނިން ހާމަކުރެއެވެ.
ހުޅުމާލެ ބަހުގެ ހިދުމަތުގެ އަގަކީ 5 ރުފިޔާއެވެ. ހިދުމަތް އެކަށީގެންވާ ފެންވަރެއްގައި ދިނުމަށް ބޭނުންވާ ބަސް ތައް ގެނައުމާއި އެއާ ގުޅިގެން ކުރަންޖެހޭ މަސައްކަތްތައްވެސް މިހާރު ކުރަމުންދާ ކަމަށް އެކުންފުނިން ވަނީ ހާމަކޮށްފައެވެ.
