މިއަދުން ފެށިގެން ކުނި ނަގާނީ ރަޖިސްޓްރީ ކޮށްފައިވާ ގެތަކުން އެކަނި ކަމަށް ވެމްކޯއިން ބުނެފިއެވެ.
ވޭސްޓް މެނޭޖްމެންޓް ކޯޕަރޭޝަން ލިމިޓެޑް ވެމްކޯއިން ބުނީ މިމަހުގެ 7 ވަނަ ދުވަހުން ފެށިގެން މިއަދާއި ހަމައަށް ރަޖިސްޓްރީ ކޮށްފައިވަނީ 2،398 ފަރާތެއް ކަމަށެވެ. މިހާތަނަށް މާލެ ސަރަހައްދުން ކުނި އުކާލުމަށް ރަޖިސްޓްރީކޮށްފައިވަނީ ޖުމްލަ 12،765 ކަމަށް ވެމްކޯއިން ބުނެއެވެ.
ކޮވިޑް19 ފެތުރެން ފެށުމުން މާލެ ސަރަހައްދުން ކުނި ނަގާ އުކާލުމަށް ވަނީ ބޮޑެތި ބަދަލުތަކެއް ގެނެސްފައެވެ. އެގޮތުން އޭރު ވަނީ ރަޖިސްޓްރީ ނުކޮށް ތިބި ގެތަކަށް ވެސް ހިދުމަތް ދީފައެވެ.
ވެމްކޯއިން ބުނެފައިވަނީ އެކުންފުނީގެ ހިދުމަތަށް 45،000 އަށްވުރެ ގިނަ ފަރާތްތަކުން މާލެ ސަރަހައްދުން ރަޖިސްޓްރީ ކުރަން ޖެހޭ ނަމަވެސް ރަޖިސްޓްރީ ކުރުމަށް ދިން މުއްދަތު ހަމަވެ ގިނަ ބަޔަކު ރަޖިސްޓްރީ ނުކުރާތީ ރަޖިސްޓްރީ ނުކުރާ ފަރާތްތަކަށް ހިދުމަތް ނުދިނުމަށް އެކުންފުނިން މިހާރު ނިންމާފައިވާ ކަމަށެވެ.
މީގެ އިތުރުންވެސް މަގުތަކަށް ނެރޭ ކުނި ނުނެގުމަށްވެސް ވެމްކޯއިން މިހާރު ވަނީ ނިންމާފައެވެ.
