ޕޮލިސް ބޯޑަށް އެއްވެސް ނުފޫޒެއް ފޯރުވާފައި ނުވާނެ ކަމަށް ހޯމް މިނިސްޓަރ އިމްރާނު އަބްދުﷲ ވިދާޅުވެއްޖެއެވެ.
ފުލުހުންގެ އިސް 7 އޮފިސަރަކު ވަޒީފާއިން ވަކިކޮށް، ފިޔަވަޅު އަޅަން ނިންމާފައިވަނީ އިންސާފުންތޯއާއި، އަދި އެއްވެސް ސިޔާސީ ނުފޫޒެއް ފޯރުވާފައިވޭތޯ ނައިފަރު ދާއިރާގެ މެމްބަރު އަހުމަދު ޝިޔާމް ކުރެއްވި ސުވާލުގެ ޖަވާބުދެއްވަމުން މިނިސްޓަރ އިމްރާނު ވިދާޅުވީ، މިހާރު ފުލުހުންގެ ވަޒީފާއި ތިބި 7 އޮފިސަރަކު ވަޒީފާއިން ވަކިކުރަން ޕޮލިސް ބޯޑުން ނިންމެވި ނިންމެވުމަށް އެއްވެސް ނުފޫޒެއް ފޯރުވާފައި ނުވާނެ ކަމަށެވެ.
އަދި ޕޮލިސް ބޯޑުން ގާނޫނުގައި މަތިކޮށްފައިވާ މުއްދަތުގައި ބަލަންޖެހޭ ހުރިހާ ކަމެއް ބެލުމަށްފަހު މިހާތަނަށް ނިންމާފައިވާ ނިންމުންތަކަކީ ޕޮލިސް ބޯޑުން ބަލަންޖެހޭ ހުރިހާ ކަމަކަށް ބެލުމަށްފަހު ގާނޫނުގެ ހުދޫދުގެ ތެރެއިން ނިންމާފައިވާ ނިންމުންތަކެއްކަމަށް ހޯމް މިނިސްޓަރ ވިދާޅުވިއެވެ.
މީގެ އިތުރުންވެސް ވަޒީފާއިތިބި 7 އޮފިސަރުންގެ ތެރެއިން ދެ އޮފިސަރަކަށް ވަކިކުރުމުގެ ނޯޓިސް ފޮނުވާފައިވާ ކަަމުގެ ވާހަކަތަކެއް ނިމުނު ހަފްތާތެރޭގައި ވަނީ ފެތުރިފައެވެ. ނަމަވެސް ކަމާބެހޭ އެއް ވެސް މުއައްސަސާއަކުން މިކަން ކަށަވަރުކޮށްދީފައެއް ނުވެއެވެ.
