ކުޑަކުދިންގެ ހައްގުތަކުގެ ގާނޫނާއި ކުޑަކުދިންގެ އަދުލުގެ ގާނޫނާއި ޖިނާއި އިޖުރާތުގެ ގާނޫނާ ގުޅޭގޮތުން މައުލޫމާތު ދިނުމުގެ ޕްރޮގްރާމެއް ފުލުހުން ފަށައިފިއެވެ.
ފުލުހުން ބުނީ މި ޕްރޮގްރާމަކީ މޯލްޑިވްސް ޕޮލިސް ސަރވިސްގެ ފެމިލީ އެންޑް ޗައިލް ޕްރޮޓެކްޝަން ވިންގާއި، ޖުވެނައިލް ޖަސްޓިސް ޔުނިޓާއި، ޔުނިސެފް މޯލްޑިވްސްއާއި، ޕްރޮސެކިއުޓަރ ޖެނެރަލް އޮފީސް އަދި އާކް ގުޅިގެން ކުރިއަށް ގެންދާ ސިލްސިލާ ޕްރޮގްރާމްތަކުގެ ދަށުން ކުރިއަށް ގެންދާ ޕްރޮގްރާމެއް ކަމަށެވެ.
ފުލުހުން ބުނީ އަނިޔާ ލިބޭ ކުދިން ހިމެނޭ މައްސަލަތަކާއި ކުށްކުރާ ކުޑަކުދިން ހިމެނޭ މައްސަލަތަކުގައި ކުށުގެ ވެށީގައި މަސައްކަތްކުރާއިރު އަމަލުކުރަންޖެހޭ އުސޫލުތަކާއި ވިސްނަންޖެހޭ ކަންތައްތަކާ ގުޅޭގޮތުންވެސް މި ޕްރޮގްރާމްގައި މައުލޫމާތު ހިއްސާކުރާނެ ކަމަށެވެ.
އަދި މި ދާއިރާގައި އެކުގައި މަސައްކަތްކުރާ ފަރާތްތަކާއެކު މަސައްކަތްކުރާނެ ގޮތްތަކާއި އެގޮތަށް މަސައްކަތް ކުރުމުގެ ތެރޭގައި ދިމާވާ ދަތިތަކާއި އެކަންކަން ހައްލުކުރުމަށް މަސައްކަތްކުރާނެ ގޮތްތަކާ ގުޅޭގޮތުންވެސް މައުލޫމާތު ދޭނެއެވެ. މި އޮކްޓޯބަރ މަހުގެ 3 އިން 7 އަށް ގަން އީކުއޭޓަރ ވިލެޖް ރިސޯޓުގައި ކުރިއަށް ގެންދާ މި ޕްރޮގްރާމުގައި ސައުތު ޕޮލިސް ޑިވިޜަންގެ 78 މުވައްޒަފުން ބައިވެރިވެއެވެ.
