އުއްތަމަ ފަނޑިޔާރު އަހްމަދު މުއުތަސިމްގެ ގެކޮޅުގެ ސެކިއުރިޓީ ފަޅާލައި މިދިޔަމަހުގެ 30 ވަނަ ދުވަހު އެ ގޮކޮޅަށް މީހަކު ވަތް ގޮތެއް ހޯދުމަށް ރައްޔިތުންގެ މަޖިލީހަށް މައްސަލައެއް ހުށަހަޅައިފިއެވެ.
މިއަދުގެ ޖަލްސާގައި މި މައްސަލަ މަޖިލީހަށް ހުށަހެޅުއްވި ފޮނަދޫ ދާއިރާގެ މެމްބަރު މޫސާ ސިރާޖު ވިދާޅުވީ، 6 މެއި ގައި މަޖިލީހުގެ ރައީސް ނަޝީދަށް ދިން ހަމަލާއާއި ގުޅިގެން މަޖިލީހުގެ 241 ކޮމިޓީން ހިންގި ތަހުގީގަށް ފަހު އާއްމުކުރި ރިޕޯޓްގައިވާ ގޮތުން އެމަލާ ދެވިފައިވަނީ ސަލާމަތީ ކަންކަން ބަލަން ޖެހޭ މިންވަރަށް ބެލިފައި ނުވާތީ ކަމަށެވެ. އަދި ރައްޔިތުންގެ މަޖިލީހުގެ ރައީސް އަވަހާރަކޮށްލަން ހަމަލާއެއް ދިންތާ ފަސް މަސް ހަމަނުވެ އޮތްވާ އަޑުއިވިގެން މިދިޔައީ އުއްތަމަ ފަނޑިޔާރުގެ ގެކޮޅުގެ ސެކިއުރިޓީ ބުރީޗެއް ހިނގި ވާހަކަ ކަމަށާއި ދައުލަތުގެ ތިން ބާރުގެ ތެރެއިން ދެ ބާރުގެ ވެރިންގެ ސެކިއުރިޓީ ބުރީޗްވުމަކީ މުޅި ރައްޔިތުންގެ ސެކިއުރިޓީ އާ މެދު ސުވާލު އުފެދޭ ކަމެއް ކަމަށެވެ.
އެ މައްސަލަ މަޖިލީހަށް ބަލައިގަތީ 28 މެމްބަރުންގެ ވޯޓާ އެކުގައެވެ.
އުއްތަމަ ފަނޑިޔާރު އަހުމަދު މުއުތަސިމް އަދުނާންގެ ގެކޮޅުގެ ސީސީޓީވީ ކެމެރާ ހަލާކޮށްލައި، ސެކިއުރިޓީ ފޫއަޅުވާލި މީހާ ފުލުހުން ވަނީ މިހާރު ހައްޔަރުކޮށްފައެވެ.
މީގެ އިތުރުން އުއްތަމަ ފަނޑިޔާރުގެ ގެކޮޅަށް ވަނީ މަސްތުވާތަކެތީގެ މައްސަލައެއްގެ ޝިކާރައަކަށްވެފައިވާ މީހެއް ކަމަށްބުނެ ނިންމާލެވެން ނެތް ކަމަށާއި ކަންކަން ސީރިއަސް ކޮށް ނަގަން ޖެހޭ ހާލަތަށް ގައުމު މިވަނީ ގޮސްފައި ކަމަށް ސިރާޖު ވިދާޅުވިއެވެ. އެހެންކަމުން މިމައްސަލަ ހުށަހެޅީ ކަން ހިނގާފައިވާ ގޮތް ބެލުމަށާއި މިކަމުގައި ކަންބޮޑުވުން އޮތް މިންވަރުން ކަމަށް ސިރާޖު ވިދާޅުވިއެވެ.
