މިމަހުގެ 15 ގެ ފަހުން އިންޑިއާ އަށް ދާން ވިސާ ބޭނުމެއް ނުވާނެ ކަމަށް ދިވެހިރާއްޖޭގައި ހުންނަ އިންޑިއާގެ ހައިކޮމިޝަނުން ހާމަކޮށްފިއެވެ.
ދިވެހިރާއްޖޭގައި ހުންނަ އިންޑިއާގެ ހައިކޮމިޝަނުން ކުރެއްވި ޓުވީޓެއްގައި ބުނީ، މިމަހުގެ 15 ވާ ހުކުރު ދުވަހުން ފެށިގެން ދިވެހިންނަށް ވިސާއާ ނުލާ އިންޑިއާއަށް ދަތުރުކުރެވޭނެ ގޮތް ހަމަޖައްސައިފައިވާ ކަމަށެވެ. އެގޮތުން ބޭސްފަރުވާ އަށާއި ވިޔަފާރިއާއި ޗުއްޓީ ހޭދަކުރުމަށް އިންޑިއާއަށް ދާ ދިވެހިންނަށް ވިސާ އާ ނުލާ އެގައުމަށް އެތެރެވެވޭނެ ކަމަށެވެ.
މި ފުރުސަތާއެކު ރާއްޖެއާއި އިންޑިއާ ދެމެދު 2018 ވަނަ އަހަރު ވެފައިވާ ބައިލެޓްރަލް ވިސާ ފްރީ އެގްރީމަންޓަށް އަލުން އިއާދަކުރެވިގެންދާނެކަން އިންޑިއާ ހައިކޮމިޝަންގެ ޓުވީޓްގައި ވަނީ ފާހަގަކޮށްފައެވެ. އިންޑިއާއަށް ހާއްސަގޮތެއްގައި ބޭސްފަރުވާ އަށް ދާ ދިވެހިންނަށް ވިސާ ލިބުމުގައި ބޮޑެތި ގޮންޖެހުންތަކެއް ވަނީ ކުރިމަތިވެފައެވެ. އަދި މިކަމާ ގިނަ ބަޔަކު ދަނީ ފާޑުވެސް ކިޔަމުންނެވެ.
