މިނިމަމް ވޭޖް ބޯޑުން ނިންމި އެންމެ ކުޑަ އުޖޫރައިގެ އަދަދު އިކޮނޮމިކް މިނިސްޓްރީން އިތުރަށް ދިރާސާ ކުރަން ނިންމާފައިވާ ކަމަށް އެ މިނިސްޓްރީން ހާމަކޮށްފިއެވެ.
މިނިސްޓްރީން މިއަދު ނެރުނު ނޫސްބަޔާނެއްގައި ބުނެފައިވަނީ، މިނިމަމް ވޭޖް ބޯޑުން އެންމެ ކުޑަ އުޖޫރައާއި ގުޅޭގޮތުން އެ މިނިސްޓްރީއަށް ދީފައިވާ ލަފާތައް ވަނީ މީޑިއާއަށް އާއްމުކޮށްފައެވެ.
1 ޕްރައިވެޓް ސެކްޓަރުގެ ކުދި ވިޔަފާރިތަކަށް މަހެއްގެ މައްޗަށް 5000 ރުފިޔާގެ އުޖޫރަ
2 ޕްރައިވެޓް ސެކްޓަރުގެ މެދު ފަންތީގެ ވިޔަފާރިތަކުން މަހެއްގެ މައްޗަށް 7000 ރުފިޔާގެ އުޖޫރަ
3 ޕްރައިވެޓް ސެކްޓަރުގެ މެދު ފަންތީގެ އަދި ކުދި ވިޔަފާރިތަކުގެ ތެރޭގައި ނުހިމެނޭ ވިޔަފާރިތަކަށް 8000 ރުފިޔާގެ އުޖޫރައެއް
4 ޕަބްލިކް ސެކްޓަރުގެ ދާއިމީ މުވައްޒަފުންނަށް މަހަކަށް 7000 ރުފިޔާގެ އުޖޫރަ
މިނިސްޓްރީން ބުނީ ބިދޭސީ މަސައްކަތްތެރިންނަށް އެންމެ ކުޑަމިނުން ދޭންޖެހޭނެ އުޖޫރައިގެ އަދަދާ ގުޅޭގޮތުން އިތުރަށް ދިރާސާކުރުމަށްފަހު ފަހުގެ މުއްދަތެއްގައި ލަފައެއް ދިނުން އަދި ބިދޭސީ މަސައްކަތްތެރިންނަށް އެންމެ ކުޑަމިނުން ދޭންޖެހޭނެ އުޖޫރައަށް އަމަލުކުރަން ފެށުމަށް ގާނޫނުގެ 62 ވަނަ މާއްދާގެ ކ ގައި ބަޔާންކުރާ މުއްދަތު ޖުމުލަ 5 އަހަރު ދުވަހަށް އިތުރު ކުރުމަށް ލަފާދޭ ކަމަށެވެ.
މިނިސްޓްރީން ބުނީ އެންމެ ކުޑަމިނުން ދޭންޖެހޭނެ އުޖޫރައިގެ އަދަދާ ގުޅޭގޮތުން މިނިމަމް ވޭޖް އެޑްވައިޒަރީ ބޯޑުން މިނިސްޓަރަށް އަރުވާފައިވާ ލަފާ ގާނޫނުގެ 62 ވަނަ މާއްދާގައި ބަޔާންކުރާ ގޮތުގެ މަތިން މިނިސްޓްރީން ދިރާސާ ކުރަމުން ގެންދާ ކަމަށާއި މި ދިރާސާއަށްފަހު ދިވެހިރާއްޖޭގައި މަސައްކަތްކުރާ މީހުންނަށް އެންމެ ކުޑަމިނުން ދޭންޖެހޭނެ އުޖޫރަ ކަނޑައަޅައި އާއްމު ކުރާނެ ކަމަށެވެ.
