ރާއްޖެ އިންޑިއާ ގުޅުމުގެ ތެރެއިން އިހުސާސް ވަނީ އަޅުވެތިކަން ކަމަށް ނައިފަރު ދާއިރާގެ މެމްބަރު އަހުމަދު ޝިޔާމް ވިދާޅުވެއްޖެއެވެ.
ޝިޔާމް ކުރެއްވި ޓުވީޓެއްގައި ވިދާޅުވީ، ދެ ސަރުކާރުގެ ގުޅުން މާ ބަދަހި ކަމަށް ދައުވާ ކުރާއިރު 3 އަހަރުވީ ސަރުކާރުން އަދާ ހަމައަށް މިހާލު ދިވެހި ރައްޔިތުންނަށް ޖެއްސުމަކީ ދެ ގައުމުގެ ޒަމާންވީ ގުޅުމުގެ އަދުގެ ނިޔަތާއި އަދި މަގުސަދާ ދޭތެރޭ ސުވާލު އުފެދޭ ކަމެއް ކަމަށެވެ. ޝިޔާމް މިހެން ވިދާޅުވީ، މިއަދާ ހަމައަށް އިންޑިއާ އަށް ދިއުމަށްޓަކައި ވިސާ ހޯދުމަށް އިންޑިއަން ހައި ކޮމިޝަނުގެ ދަށުގައި ދިވެހިން ކިޔޫ ހަދައިގެން ތިބެންޖެހޭ ތިބުމަށް އިޝާރާތް ކޮށެވެ.
ދިވެހިރާއްޖޭގައި ހުންނަ އިންޑިއާ ހައިކޮމިޝަނުން މިއަދު ކުރި ޓުވީޓެއްގައި ބުނީ، މިމަހުގެ 15 ވާ ހުކުރު ދުވަހުން ފެށިގެން ދިވެހިންނަށް ވިސާއާ ނުލާ އިންޑިއާއަށް ދަތުރުކުރެވޭނެ ގޮތް ހަމަޖައްސައިފައިވާ ކަމަށެވެ. އެގޮތުން ބޭސްފަރުވާ އަށާއި ވިޔަފާރިއާއި ޗުއްޓީ ހޭދަކުރުމަށް އިންޑިއާއަށް ދާ ދިވެހިންނަށް ވިސާ އާ ނުލާ އެގައުމަށް އެތެރެވެވޭނެ ކަމަށެވެ.
