އެކުވެރި އިންޑިއާ އާއި ދިވެހި ސަރުކާރާ ދެމެދު ވެފައިވާ އުތުރުތިލަފަޅުގެ އެއްބަސްވުން ހޯދުމަށް މަޖިލީހުން މިއަދު ޑިފެންސް މިނިސްޓްރީގައި އެދޭނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުން ނަޝީދު ވިދާޅުވީ، އުތުރު ތިލަފަޅުގެ އެއްބަސްވުމަކީ ސިއްރު އެއްބަސްވުމެއް ނޫން ކަމަށެވެ. މިއީ އެކުވެރި ދެ ދައުލަތެއްގެ ދެމެދުގައި ވެފައިވާ އެއްބަސްވުމެއް ކަމަށް ނަޝީދު ވިދާޅުވިއެވެ.
މިއެއްބަސްވުން މަޖިލީހުން ހޯދުމަށް ނިންމާފައިވަނީ މަޑުއްވަރީ ދާއިރާގެ މެމްބަރު އާދަމް ޝަރީފު އުމަރުގެ އެދުމުގެ މަތިން ކަމަށް ރައީސް ނަޝީދު ވިދާޅުވިއެވެ. ނަޝީދު ވިދާޅުވީ، މައުލޫމާތު ލިބިފައިވާ އޮތް ގޮތުން މިއަދު މަޖިލީހުގެ އަމީން އާންމު މިނިސްޓްރީ އޮފް ޑިފެންސްގައި، އުތުރު ތިލަފަޅުގެ އެގްރީމެންޓްގެ ކޮޕީއެއް މަޖިލީހަށް ދެއްވުމަށް އެދި ދަންނަވާނެ ކަމަށާއި އަދި އިއްޒަތްތެރި މެންބަރަށް އެ އެގްރީމެންޓްގައިވާ ހުރިހާ އަކުރެއް އޮޅުން ފިލުވާ ދެވޭތޯ ކޮމިޓީގެ ފަރާތުން ބަލާނެ ކަމަށެވެ.
އިދިކޮޅު ފަރާތްތަކުން ތުހުމަތު ކުރާ ގޮތުގައި އުތުރުތިލަފަޅުގައި އަސްކަރީ ބަނދަރަކާއި ޑޮކްޔާޑެއް ތަރައްގީކުރުމަށް ދިވެހި ސަރުކާރުން އިންޑިއާއާ އެކު ހަދައިފައިވާ އެއްބަސްވުމުގައި ގައުމުގެ މިނިވަންކަމާއި އިސްތިގުލާލަށް ބުރޫއަރާގެ އެތައް ކަމެއް އެބަހުއްޓެވެ.
ޑިފެންސް މިނިސްޓްރީން ބުނެފައި ވަނީ އެ އެއްބަސްވުން ހާމަކޮށްފި ނަމަ ގައުމީ ސަލާމަތަށް ނުރައްކާވެދާނެ ކަމަށެވެ.
