އަޅުގަނޑު އައީ 3 ދުވަހަށް ކަމަށް ނިންމެވީ ނޫސްވެރިން ކަމަށާއި އެއީ އެެއްވެސް ތަނެއްގަ ދެއްކި ވާހަކައެއް ނޫން ކަމަށް މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މިއަދު ނޫސްވެރިންނާއި ބައްދަލު ކުރައްވާ ދެއްކެވި ވާހަކަފުޅުގައި ނަޝީދު ވިދާޅުވީ، މިއަދުމީ ރާއްޖެ އައިތާ 3 ވަނަ ދުވަސް ކަމަށާއި މިއަދު ފުރާ ގޮތަކަށް ހަމަޖެހިފައެއް ނެތް ކަމަށެވެ. އަދި ސަލާމަތީ ސަބަބުތަކާއި ހެދި ރާއްޖެއިން ނަޝީދު ފުރައިވަޑައިގަންނަވާ ދުވަސް ހާމަކުރެވެން ނެތް ކަމަށް ނަޝީދު ވިދާޅުވީ ތަކުރާރުކޮށް ނޫސްވެރިން އެ ސުވާލު ކުރަން ފެށުމުންނެވެ.
ނަޝީދު ވިދާޅުވީ ހޮޓެލް ޖެންގައި މަޑުކުރެއްވީ ސަރުކާރުގެ ފަރާތުން ރައްޔިތުންގެ މަޖިލީހުގެ ރައީސްއަށް ހާއްސަކޮށް ހައްދަވަމުން ގެންދަވާ ގެކޮޅު ނިމެންދެން ކަމަށެވެ. ނަޝީދުގެ އަމިއްލަފުޅު ގޭގައި ހުންނަވަން ބޭނުންފުޅު ނަމަވެސް ސަލާމަތީ ބާރުތަކުން ހުއްދަ ދީފައިނުވާތީ އެގޭގައި ހުރެވެން ނެތް ކަމަށް ނަޝީދު ވިދާޅުވިއެވެ.
