އިރާދަފުޅުން އައު ހިތްވަރަކާއެކު ގައުމީ ފުޓްބޯޅަ ޓީމް އަލުން ނިކުންނާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ގައުމީ ޓީމަށް ހިތްވަރު ދެއްވާ ކުރެއްވި ޓުވީޓެއްގައި ނަޝީދު ވިދާޅުވީ، ނާކާމިޔާބީގައި ހިތްވަރު ގަދަ ކުރަން ވާނެ ކަމަށެވެ. އަދި އައު ހިތްވަރަކާއެކު ގައުމީ ފުޓްބޯޅަ ޓީމު އަލުން ނިކުންނާނެ ކަމީ ކަށަވަރުކަމެއް ކަމަށެވެ. މިހާރު ކުރިއަށްދާ ސާފްޗެމްޕިއަންޝިޕް ފުޓްބޯޅަ މުބާރާތުގައި ރޭ އިންޑިއާ އަތުން ބަލިވެ ރާއްޖެއަށް ވަނީ ފައިނަލަށް ދިއުމަށް އޮތް ފުރުސަތު ގެއްލިފައެވެ.
މިމަހުގެ 1 ކުން 16 ކުރިއަށްދާ މިމުބާރާތުގައި ރޭ ރާއްޖެ އިންޑިއާ އަތުން ބަލީ ތިނެއް އެކެއްގެ ނަތީޖާއަކުންނެވެ. މިމުބާރާތުގައި ރާއްޖެ ކުޅުނު ހަތަރު މެޗްގެ ޗެރެއިން ދެ މެޗުން މޮޅުވެ ދެ މެޗުން ވަނީ ބަލިވެފައެވެ. ރޭ މެޗްގައި ރާއްޖެއަށް ޖެހުނު ލަނޑަކީ އިންޑިއާގެ ކުޅުންތެރިއަކުން ރާއްޖޭގެ ޓީމްގެ ހަމްޒާ އަށް ކުރި ފައުލަކާ ގުޅިގެން ލިބުނު ޕެނަލްޓީއަކުން އަލީ އަޝްފާގު ޖެހި ގޯލެކެވެ.
