ގެއްލިގެން ހޯދަމުންދާ ކުއްޖާގެ މަންމަ ނިޔާވެއްޖެއެވެ.
އޮޅުވެލި ރިސޯޓް ކައިރިން ކަނޑުމަތީގައި ހާދިސާއެއް ހިނގައިގެން އެމްއެންޑީއެފް ކޯސްޓްގާޑުން ހަރަކާތްތެރިވާން ފަށައިފައި ވަނީ މިއަދު ހަވީރުއެވެ. މި ހާދިސާގެ މަޢުލޫމާތު އެމްއެންޑީއެފް ކޯސްޓްގާޑް މެރިޓައިމް ރެސްކިޔު ކޯޑިނޭޝަން ސެންޓަރަށް ލިބިފައި ވަނީ މިއަދު 17:10 ހާއިރު ކަމަށް އެ އިދާރާއިން ހާމަކުރެއެވެ.
މިއަދު ހަވީރު 16:00 ގައި ފުރި މި ލޯންޗު އަޑިއަށް ގޮސްފައިވަނީ އޮޅުވެލި ރިސޯޓު ކައިރިންނެވެ. އެމްއެންޑީއެފުން ހާމަކުރާ ގޮތުގައި ލޯންޗު އަޑިއަށް ދިޔައިރު، އެލޯންޗުގައި ކުޑަ ދެ ކުދިންނާއި އެކު ޖުމްލަ 12 މީހަކު ތިއްބެވެ. އަދި އެ ހާދިސާގައި ކަނޑަށް ވެއްޓިފައިވަނީ 3 މީހުން ނަމަވެސް އޭގެ ތެރެއިން ދެ މީހަކު ފެނިފައިވާ ކަމަށް އެމްއެންޑީއެފުން ބުނެއެވެ.
އޮޅުވެލި ރިސޯޓް ކައިރިން ކަނޑުމަތީގައި ހިނގި ހާދިސާގައި ލޯންޗަށް ރާޅެއް އަރައި ތިން މީހަކު މޫދަށް ވެއްޓި 4 އަހަރުގެ ފިރިހެން ކުއްޖަކު ވަނީ ގެއްލިފައެވެ. މި ކުއްޖާ ހޯދުމުގެ މަސައްކަތުގައި އެމްއެންޑީއެފް ކޯސްޓްގާޑު ޝިޕް ޝަހީދު ޢަލީ ދަނީ އެ ސަރަހައްދުގައި ހަރަކާތްތެރިވަމުންނެވެ.
ގެއްލިގެން ހޯދަމުން ދަނިކޮށް ފެނުނު އެކަކީ ގެއްލިގެން ހޯދަމުންދާ ކުޑަ ކުއްޖާގެ މަންމައެވެ. އެކުއްޖާގެ މަންމަ ފެނުމާއި އެކީ ފަރުވާ ދިނުމަށް ގެންގޮސްފައިވަނީ ކ. ގުރައިދޫ ސިއްހީ މަރުކަޒަށެވެ. އަދި ގެންދިޔައިރުވެސް އެ އަންހެންމީހާ ވަނީ ނިޔާވެފައި ކަމަށް މައުލޫމާތުލިބެއެވެ.
