އަމީނީމަގު ސީގަލް ފުޑްސް ފިހާރަ ހުންނަ އިމާރާތުގެ 4 ވަނަ ފަންގިފިލާގައި އަލިފާން ރޯވެއްޖެއެވެ.
އެމްއެންޑީއެފުން ބުނީ އަމީނީމަގު ސީގަލް ފިހާރަ އިންވެގެން ހުރި އިމާރާތުގައި އަލިފާން ރޯވެގެން އެމްއެންޑީއެފް ފަޔަރ އެންޑް ރެސްކިއު ސަރވިސްގެ ސިފައިން ދަނީ ހަރަކާތްތެރިވަމުން ކަމަށާއި ހާދިސާގެ ރިޕޯރޓް އެފްއާރްއެސް އަށް ލިބިފައިވަނީ މިއަދު 11:51 ހާއިރު ކަމަށެވެ.
އެސަރަހައްދުގައި ހުރި މީހަކު ހަމައަށް މައުލޫމާތު ދެމުން ބުނީ މިއިމާރާތުގެ އެތެރޭގައި އަދިވެސް ކޮންމެވެސް ވަރަކަށް އަލިފާން ހުރި ކަމަށް ފާހަގަވެފައިވާތީ އެމްއެންޑީއެފުގެ ފަޔަރ މަނުން އެ އިމާރާތުގެ އެތެރެއަށް ވަނުމުގެ މަސައްކަތް ކުރަމުންދާ ކަމަށެވެ. މި އިމާރާތުގައި އަލިފާން ހިނގަން މެދުވެރިވި ސަބަބެއް އަދި އެނގިފައި ނުވާއިރު މިހާރުވެސް އެ އިމާރާތުން ދަނީ ވަރަށް ބޯކޮށް ދުން އަރަމުންނެވެ.
ގ.ތުނޑި ހަތަރުވަނަ ފަންގިފިލާގައި ރޯވި އަލިފާން ވަނީ 12:16 ހާއިރު ނިއްވާލެވިފައި ކަމަށާއި މި ހާދިސާގައި އެއްވެސް މީހަކަށް އަނިޔާއެއް ލިބިފައެއް ނުވާ ކަމަށް އެމްއެންޑީއެފުން ހާމަކުރެއެވެ.
