2010ގައި އެއަރޕޯޓް ޖީއެމްއާރަށް ހަވާލުކުރީ ރާއްޖޭގެ އިގްތިސާދު ދެގުނަ ކުރުމަށް ކަމަށް އެއަރޕޯޓް ޖީއެމްއާރަށް ދިން އިރު ވެރިކަމުގައި ހުންނެވި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު ކުރެއްވި ޓުވީޓެއްގައި ވިދާޅުވީ، ހުޅުލެ އެއަރޕޯޓް ތަރައްގީ ކުރުމުގެ މަސައްކަތް 2010 ގައި ވޯލްޑް ބޭންކްގެ އެހީގައި ޓެންޑަރ ކޮށް ކާމިޔާބު ކުރި ޖީއެމްއާރަށް ހަވާލުކުރެވުނީ ރާއްޖޭގެ އިގްތިސާދު ދެ ގުނަ ކުރުމުގެ ނިޔަތުގައި ކަމަށެވެ. އަދި އޭރުވެސް މިހާރުވެސް މާހިރުން ބުނަމުން ދިޔައީ ބޭނުންވަނީ ޓާރމިނަލް ބޮޑުކޮށް އަލުން ބިނާ ކުރުމަށް ކަމަށް ނަޝީދު ވިދާޅުވިއެވެ.
ނަޝީދު މިހެން ވިދާޅުވިއިރު އިންޑިއާގެ ޖީއެމްއާރު އަތުން އެއަރޕޯޓް އަތުލުމަކީ މިހާތަނަށް ރާއްޖޭގައި ހިންގާފައިވާ އެންމެ ބޮޑު އިގްތިސާދީ ޖަރީމާގެ ގޮތުގައި ސިފަކުރައްވައި ފިނޭންސް މިނިސްޓަރު އިބްރާހީމް އަމީރުވަނީ އިއްޔެ ވާހަކަ ދައްކަވާފައެވެ.
މީގެ އިތުރުންވެސް ރައީސް ނަޝީދުގެ ދައުރުގައި ޓުއަރިޒަމް މިނިސްޓަރުކަން ކުރެއްވި ޑރ.އައިމިނަތު ޒުލްފާވަނީ ދާދިފަހުން އެއާޕޯޓު ޖީއެމްއާރަށް ރައީސް ނަޝީދު ދެއްވީ 78 މިލިއަން އެމެރިކާ ޑޮލަރުގެ ބަދަލުގައިކަމަށް ވިދާޅުވެ ކޮރަޕްޝަނުގެ ބޮޑު ތުހުމަތެއް ނަޝީދަށް އަމާޒުކުރައްވާފައެވެ.
