ކާމިޔާބުވާނީ ގޮންޖެހުންތަކުން އަރައިގަނެ ކުރިއަށްދާން ހިތްވަރު ހޯދުނު ބަޔަކަށް ކަމަށް މިނިސްޓަރ އޮފް ހޯމް އެފެއަރޒް އިމްރާން އަބްދުﷲ ވިދާޅުވެއްޖެއެވެ.
މިނިސްޓަރ އިމްރާން ކުރެއްވި ޓުވީޓެއްގައި ވިދާޅުވީ، ކަންކަން ރަނގަޅު ކުރަން އުޅޭއިރު ލައްކަ ގިނަ ގޮންޖެހުންތަކާއި ކުރިމަތިވުމަކީ ވަރަށް ތަބީއީ ކަމެއް ކަމަށެވެ. އަދި ކާމިޔާބުވަނީ ގޮންޖެހުންތަކުން އަރައިގަނެ ކުރިއަށް ދިއުމުގެ ހިތްވަރު ހޯދުނު ބަޔަކަށް ކަމަށް އިމްރާން ވިދާޅުވިއެވެ.
ހޯމް މިނިސްޓަރ މިގޮތަށް ޓުވީޓް ކުރެއްވި އިރު މިއީ ސީދާ ކޮންކަމަކަށް އަމާޒުކޮށް ވިދާޅުވި ބަސްފުޅެއް ކަމަށް ސާފެއް ނުވެއެވެ. ނަމަވެސް ރޭގެ ވަގުތެއްގައި ވަނީ ރައީސް އިބްރާހިމް މުހައްމަދު ސާލިހު ވިދާޅުވެގެން ހޯމް މިނިސްޓްރީގެ އިހުތިސާސްގެ ތެރެއިން ފުލުހުންގެ މުއައްސަސާ ވަކި ކުރަން އަންގާ ފޮނުއްވާފައިވާ ސިޓީއެއް މީޑިއާއަށް އާއްމުވެފައެވެ. އަދި މިކަމާ ގުޅިގެން ހޯމް މިނިސްޓަރ އިމްރާނުގެ އެއްވެސް ބާރެއް މިވަގުތު ސަރުކާރުގައި ނެތް ކަމަށް އިދިކޮޅު ފަރާތްތަކުން ދަނީ ތުހުމަތު ކުރަމުންނެވެ.
