ވެކްސިންގެ ބޫސްޓަރ ޑޯޒް މިހާތަަނަށް 601 މީހުން ޖަހައިފައިވާ ކަމަށް ހެލްތް ޕްރޮޓެކްޝަން އެޖެންސީން ހާމަކޮށްފިއެވެ.
ކޮވިޑް19 ވެކްސިންގެ ބޫސްޓަރ ޑޯޒް ޖަހަން ފަށާފައިވަނީ މިމަހުގެ ދެ ވަނަ ދުވަހުން ފެށިގެންނެވެ. އެގޮތުން މި ވެކްސިން ޖަހަމުންދަނީ ވެކްސިންގެ ދެ ޑޯޒް ޖެހިފަހުން ހަ މަސް ދުވަސްވެފައިވާ މީހުނަށެވެ. އަދި އެޕޮއިންޓްމަންޓާއެކު ބޫސްޓަރ ޑޯޒް ޖަހަން ހުޅުވާލައިފައިވަނީ އޭޑީކޭ ހޮސްޕިޓަލް އަދި ހުޅުމާލެ ހޮސްޕިޓަލުންނެވެ. އެގޮތުން އޭޑީކޭ ހޮސްޕިޓަލުން ހެނދުނު ނުއަކުން މެންދުރުފަހު ދެއަކަށެވެ. ހުޅުމާލެ ހޮސްޕިޓަލުން މެންދުރު ފަހު އެކަކުން ތިނަކަށެވެ.
އެޗްޕީއޭގެ އޭރު ބުނެފައިވަނީ ވެކްސިންގެ 2 ޑޯޒް ފުރިހަމަކޮށްފައިވާ ފަރާތްތަކުގެ ތެރެއިން ބަލިޖެހުމުން ނުރައްކާ ބޮޑުވެދާނެ ފަރާތްތަކާއި ފްރައިންޓްލައިންގައި މަސައްކަތް ކުރައްވާ ސިއްހީ ހިދުމަތްތެރިންނަށް އިތުރު ވެކްސިން ޑޯޒްއެއް ދިނުމަށް މޯލްޑިވްސް ޓެކްނިކަލް އެޑްވައިޒަރީ ގްރޫޕް އޮން އިމިއުނިޒޭޝަނުން ވަނީ ލަފާދެއްވާފައި ކަމަށެވެ. މިގޮތަށް ނިންމާފައިވަނީ ކަމާބެހޭގޮތުން މިހާތަނަށްކުރެވިފައި ހުރި ދިރާސާތަކަށް ބެލުމަށްފަހު ކަމަށާއި އަދި އިތުރު ވެކްސިން ޑޯޒް ޖަހާނީ ކޮވިޑް19ގެ އެއްވެސް ވެކްސިނެއްގެ 2 ވަނަ ޑޯޒްޖެހިފަހުން 6 މަސް ދުވަސް ފުރިހަމަވެފައިވާ ފަރާތްތަކަށް ކަމަށެވެ.
މިވަގުތު ކޮވިޑް19 ވެކްސިންގެ އިތުރު ޑޯޒް ޖެހުމަށް ހަމަޖެހިފައިވާ ފަރާތްތަކަކީ ފްރަންޓްލައިންގައި މަސައްކަތް ކުރައްވާ ސިއްހީ ހިދުމަތްތެރިން، 60 އަހަރުން މަތީގެ މީހުން އަދި ދިފާއީ ނިޒާމު ބަލިކަށި މީހުންނަށް ކަމަށް އެޗްޕީއޭއިން ހާމަކުރެއެވެ.
