އަނިޔާވެރިގޮތަކަށް މަރާލާފައި އޮތްވާ ފެނުނު ވިޔަފާރިވެރިޔާ މަޙްމޫދު އަބޫބަކުރުގެ މަރާއި ގުޅިގެން ހައްޔަރު ކުރި ބަންގލަދޭޝްމީހާ ދިރިއުޅޭ ގެއިން ގިނަ އަދަދެއްގެ ހެކި ފެނިފައިވާ ކަން ފުލުހުން ހާމަކޮށްފިއެވެ.
ފުލުހުން ބުނީ މަހްމޫދުގެ މަރުގެ ތުހުމަތުގައި މިމަހުގެ 16 ވަނަ ދުވަހުގެ ހެނދުނު 10:30 ކަންހާއިރު ބަނގްލަދޭޝް ރައްޔިތެއް ކަމުގައިވާ ޝާ އަލޮމް މިއާ (29އ) ކޯޓު އަމުރެއްގެ ދަށުން ހައްޔަރުކޮށްފައިވާ ކަމަށެވެ. އަދި މިމީހާގެ ބަންދާ މެދު ގޮތެއް ނިންމުމަށް އދ. ދަނގެތި މެޖިސްޓްރޭޓް ކޯޓަށް ހާޒިރު ކުރުމުން 15 ދުވަހުގެ މުއްދަތަށް ބަންދުގައި ބެހެއްޓުމަށް ވަނީ އަމުރުކޮށްފައި ކަމަށެވެ.
މީގެ އިތުރުން މިމައްސަލައިގެ ތަހުގީގުގައި ޝާ އަލޮމް މިއާ އދ ދަނގެތީގައި ދިރިއުޅެމުންދިޔަ ގެ ކޯޓުއަމުރެއްގެ ދަށުން ބަލައި ފާސްކޮށް، މައްސަލައާއި ގުޅުން ހުރި ކަމަށް ބެލެވޭ ގިނަ އަދަދެއްގެ ތަކެތި ވަޅުލާފައި ވަނިކޮށް ހޯދައި، ތަހުގީގު ކުރުމަށްޓަކައި ފުލުހުންގެ ބެލުމުގެ ދަށަށް ވަނީ ގެންގޮސްފައި ކަމަށް ފުލުހުން ހާމަކުރެއެވެ.
މަހްމޫދު އަބޫބަކުރު މަރާލުމުގައި ޝާ އަލޮމް މިއާގެ އިތުރުން އިތުރު މީހެއް ނުވަތަ ބައެއްގެ ބައިވެރިވުން އޮތް ކަމަށް މިހާތަނަށް ތަހުގީގު ކުރެވުނު މަސައްކަތުން ފާހަގަކުރެވިފައި ނުވާ ކަމަށްވެސް ފުލުހުން ހާމަކުރެއެވެ.
