މަދަނީ އިޖުރާއަތުގެ ބިލާއި ހެއްކާބެހޭ ބިލް އަވަސްކުރަންޖެހޭ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުން ނަޝީދު ވިދާޅުވީ، މި ބިލްތައް އަވަސް ކުރަންޖެހޭ މައިގަނޑު ސަބަބަކީ ވިޔަފާރީގެ ކަންތައްތައް ކުރިއަށް ގެންދިއުމަށް ދިމާވެފައިވާ ދަތިތައް ހައްލުކޮށް އެކަމަށް ފަސޭހައިން ފުރުސަތުތައް ފަހި ކުރުމަށް ކަމަށެވެ.
އަދި މީގެ އިތުރުން ވެސް ރައްޔިތުންގެ މަޖިލީހުގެ ކޮމިޓީތަކުގައި މިހާރު ދިރާސާ ކުރަމުންދާ ބިލުތަކުގެ މަސައްކަތް ނުނިމި ލަސްވަމުން ގޮސް ކޮމިޓީތަކުގެ މަސައްކަތް ގިނަވެފައިވާތީ މި މަސައްކަތް އަވަސް ކުރާނެ ގޮތެއް ހޯދަން މަޝްވަރާ ކުރަން ނިންމަވާފައިވާ ކަމަށް ނަޝީދު ވިދާޅުވިއެވެ.
މިއަދުގެ ޖަލްސާގައި ބިލްތަކުގެ ތަފްސީލް ދެއްވަމުން ނަޝީދު ވިދާޅުވީ، މަޖިލީހުގެ ތަޅުމުގައި މިވަގުތު ބިލެއްގެ މަސައްކަތް ނެތް ކަމަށާއި ނަމަވެސް ކޮމިޓީތަކުގައި 33 ބިލެއްގެ މަސައްކަތް ހިނގަމުންދާ ކަމަށެވެ.
މީގެ ތެރޭގައި ހިމެނެނީ ސަރުކާރުން ފޮނުވި 26 ބިލަކާއި، ރައްޔިތުންގެ މަޖިލީހުގެ މެންބަރުން ހުށަހެޅުއްވި ހަތް ބިލެކެވެ.
ނަޝީދު ވިދާޅުވީ އޭގެ ތެރޭގައި އިގްތިސާދީ ކޮމިޓީގައި އޮތް ޗެމްބާ އޮފް ކޮމާސްގެ ބިލާއި، ޖުޑިޝަރީ ކޮމިޓީގައި އޮތް ހެއްކާ ބެހޭ ބިލާއި، އިފްހާސް ކުރުމުގެ ބިލާއި، މަދަނީ އިޖުރާއަތްތަކުގެ ބިލަކީ އަވަސް ކޮށް ނިންމަންޖެހޭ ބިލްތަކެއް ކަމަށެވެ.
