މަސައްކަތު މީހުން (ދައްތަމެން) ވަޒީފާގެ މަސްއޫލިއްޔަތުތަކުން އެކަހެރިކޮށްފައިވާ ކަމަށް ގަލޮޅު ސުކޫލް ހާމަކޮށްފިއެވެ.
ގަލޮޅު ސުކޫލުން ބެލެނިވެރިންނަށް ނެރެފައިވާ ލިޔުމެއްގައި ބުނެފައިވަނީ 29 އޮކްޓޫބަރު ވީ ހުކުރު ދުވަހުން ފެށިގެން އެ ސުކޫލްގައި މަސައްކަތްކުރާ ހުރިހާ މަސައްކަތު މީހުން ދައްތަމެން ވާނީ ވަޒީފާގެ މަސްއޫލިއްޔަތުތަކުން އެކަހެރި ކުރެވިފައި ކަމަށެވެ.
އަދި ފާހާނާ ކުރުމަށް ދާ ދަރިވަރުން ފާހާނާ އަށް ދާނީ ކްލާސް ޓީޗަރުގެ ބެލުމުގެ ދަށުން ކަމަށާއި ފާހާނާ ކުރުމަށްފަހު އެހީތެރިކަން ބޭނުންވާ ދަރިވަރަކުވާނަމަ އެހީތެރިކަން ފޯރުކޮށްދިނުމަށް ބެލެނިވެރިޔާއަށް އެންގޭނެ ކަމަށް އެ ލިޔުމުގައި ބުނެފައިވެއެވެ.
މީގެ އިތުރުންވެސް ދަރިވަރުންގެ ސަލާމަތާއި ރައްކާތެރިކަމަށް ސްކޫލްގެ އެކި ސަރަހައްދުތަކުގައި 18 ޕޮއިންޓެއްގައި ސީސީޓީވީ ކެމެރާ ހަރުކޮށް ނިމިފައިވާ ކަމަށްވެސް އެސްކޫލުން ބުނެފައިވެއެވެ. ގަލޮޅު ސްކޫލުން މިގޮތަށް ލިޔުމެއް ނެރެފައިމިވަނީ އެސުކޫލްގައި ކިޔަވަމުން ދިޔަ އުމުރުން 4 އަހަރުގެ ކުއްޖަކަށް ޖިންސީ ގޯނާކޮށްފައިވާ މައްސަލައެއް ފެންމަތިވެފައި ވަނިކޮށްށެވެ. މިމައްސަލައިގައި އެކުއްޖާގެ މަންމަ ބުނެފައިވަނީ ދަރިފުޅަށް ޖިންސީ ގޯނާ ކުރި ކަމަށް ދަރިފުޅުބުނީ "ޓޮއިލެޓް ދައްތަ" އެކެވެ. އަދި އެކުއްޖާ ފާހާނާ އަށް ގެންދިއުމަށް ހަވާލު ކުރީ ކާކާތޯ އާންޓީ އާއި ސުވާލު ކުރުމުން ހަވާލުކުރެވުނީ ކާކާ ކަން ހަނދާން ނެތް ކަމަށެވެ.
މިމައްސަލައިގަ އެޑިއުކޭޝަން މިނިސްޓްރީން ބުނެފައިވަނީ ދަރިވަރަކަށް ޖިންސީ ގޯނާކުރި މައްސަލައެއް ސުކޫލަށް ހުށަހެޅި ކަމުގެ މައުލޫމާތު މިނިސްޓްރީއަށް ލިބުމާއެކު އެކަން ސީރިއަސް މައްސަލައެއްގެ ގޮތުގައި ދަނީ ބަލަމުން ކަމަށެވެ.
