ރ މަޑުއްވަރީ ސުކޫލްގައި ޕްރިންޕަލެއް ނެތުމުން، އެކަމާ ސުވާލު ކުރުމަށް އެޑިއުކޭޝަން މިނިސްޓަރު ޑރ އައިޝަތު އަލީ ރައްޔިތުންގެ މަޖިލީހަށް ހާޒިރުކުރުމަށް މަޑުއްވަރީ ދާއިރާގެ މެމްބަރު އާދަމް ޝަރީފް އުމަރު އެދިވަޑައިގަންނަވައިފިއެވެ.
މެމްބަރު އާދަމް ޝަރީފް ކުރެއްވި ޓުވީޓެއްގައި ވިދާޅުވީ، 2021 ވަނަ އަހަރުގެ މެއި މަހުން ފެށިގެން ރ މަޑުއްވަރީގައި ޕްރިންސިޕަލް އެއްނެތް ކަމަށެވެ. މިއީ ވަަރަށް ކަންބޮޑުވާ ކަމެއް ކަމަށާއި އެހެންކަމުން ޙާއްސަ އިނާޔަތެއް ހަމަޖައްސައިގެން ނަމަވެސް ރަނގަޅު ޕްރިންސިޕަލުން ތިބޭނެ ގޮތެއް ކޮންމެހެން ހަދަން ޖެހޭ ކަމަށެވެ. އަދި ބައެއް ރަށްރަށުގައި ޕްރިންސިޕަލުން ހަރުނުލާ މައްސަލަވެސް ބަލަންޖެހޭ ކަމަށް އާދަމް ޝަރީފް ވިދާޅުވެފައިވެއެވެ.
މަޖިލީހަށް އާދަމް ޝަރީފް ހުށަހެޅުއްވި ނޯޓިސްގައިވާ ގޮތުން މިއަހަރު ކުރީކޮޅުން ފެށިގެން ރ މަޑުއްވަރީ ސުކޫލް ހިންގަމުންދަނީ ޕްރިންސިޕަލަކު ނެތި ކަމަށެވެ. އެހެންކަމުން އެ ސުކޫލަށް ޕްރިންސިޕަލަކު ލިބޭނީ ކޮން ތާރީހެއްގައިތޯ އާއި އެސުކޫލަށް ޕްރިންސިޕަލަކު ނުލިބިގެން އުޅޭ ސަބަބުތަކަކީ ކޮބާތޯ ސުވާލު ކުރަން ބޭނުންވާ ކަމަށެވެ.
އަދި ޕްރިންސިޕަލުން ނުލިބޭ ރަށްރަށް ނުވަތަ ޕްރިންސިޕަލުން ހަރުލުން ރަށްރަށާމެދު ރާވާގޮތަކީ ކޮބާތޯ ވެސް ސުވާލު ކުރުމަށް ބޭނުންވާ ކަމަށް މެމްބަރު އާދަމް ޝަރީފް އެދިފައިވެއެވެ.
