ގަލޮޅު މަދްރަސާގައި މުއައްޒަފަކު ތުއްތު ދަރިވަރަކަށް ޖިންސީ ގޯނާކުރި މައްސަލައިގެ ފުރިހަމަ ތަހްގީގެއް ހިންގާ ސްކޫލްތަކުގައި ދަރިވަރުންނަށް ރައްކާތެރިކަން ކަށަވަރުކޮށްދިނުމަށް ސަރުކާރަށްގޮވާލާ ރައްޔިތުންގެ މަޖިލީހަށް މައްސަލައެއް ހުށަހަޅައިފިއެވެ.
ނައިފަރު ދާއިރާގެ މެމްބަރު އަހުމަދު ޝިޔާމް ހުށަހެޅުއްވި މިމައްސަލާގައި ބުނެފައިވަނީ، މަޖިލީހަށް މައްސަލަ ހުށައަޅަން ޖެހުނީ މިކަމުގައި އެންމެ ފުރަތަމަވެސް ސުކޫލުން އަމަލުކޮށްފައިވަނީ ވަރަށް ޒިންމާދާރުކަން ކުޑަކޮށް ކަމަށާއި ކުދިން ސުކޫލްގައި ހޭދަކުރާ ވަގުތަކީ އެކުދިންގެ ރައްކާތެރިކަމާއި ސަލާމަތްތެރިކަމުގެ ޒިންމާ ސުކޫލްތަކުން ފުރިހަމައަށް ނަގަންޖެހޭ ވަގުތުތަކެއް ކަމަށްވީނަމަވެސް ގަލޮޅު މަދަރުސާގައި އެދަރިވަރު ހަވާލުވެގެން ހުރި ޓީޗަރަށްވެސް ދަރިވަރު ހަވާލުކުރެވުނީ ކާކާކަންވެސް ނޭންގި އަދި ސުކޫލްގައި ކަން ހިނގާދިޔަ ގޮތް ބެލޭނެ ކެމެރާތަކެއްވެސް ނެތި މިކަމުގެ ޒިންމައިން ރެކެން ސްކޫލްގެ މެނޭޖްމަންޓުން މަސައްކަތްކޮށްފައިވާތީ ކަމަށެވެ.
މީގެއިތުރުން މިފަދަ ހައްސާސީ މައްސަލަތަކުގައި މެޑިކަލް ރިޕޯޓް އަވަހަށް ހެދޭނެ އިންތިޒާމުތަކެއް އަވަހަށް އެކުލަވާލުމަކީ ވަރަށް މުހިންމު ކަމެއް ކަމަށް ވީނަމަވެސް އެކަންވެސް ކުރެވުނީ ވަރަށް ލަހުން ކަމަށްވާތީ އާއި ރިޕޯޓް ހެދުމަށް ލަސްވުމަކީ މިފަދަ މައްސަލަތަކުގައި ލިބޭ އަނިޔާގެ މިންވަރު ދެނެގަތުމަށް އެޅޭ ހުރަހަކަށް ވާތީއާއި، މިމައްސަލައާއި ގުޅިގެން އެޑިއުކޭޝަން މިނިސްޓްރީއާއި ޖެންޑަރ މިނިސްޓްރީ ގުޅިގެން ނިންމަންޖެހޭ ނިންމުންތައް އެހާމެ ލަސްކަމާއި އަދި މިމައްސަލައަށް ސަމާލުކަމެއް ލިބުނީ މީޑިއާއިން މިކަމުގެ ރިޕޯޓްތައް ގެނެސްދޭން ފެށުމުން ކަމަށް ވެސް ޝިޔާމް ހުށަހެޅުއްވި މައްސަލާގައި ބުނެފައިވެއެވެ.
ސިޔާމް މިމައްސަލަ މަޖިލީހަށް ހުށަހެޅުއްވީ، މިފަދަ މައްސަލަތަކުގެ ސަބަބުން ބެލެނިވެރިންނާއި ދަރިވަރުންގެ ހިތްތަކުގައި ބިރުވެރިކަން އުފެދިފައިވާތީ ސުކޫލްތަކުަގއި މިހާރަށްވުރެ ބޮޑަށް ދަރިވަރުންނަށް ރައްކާތެރިކަން ކަށަވަރުކޮށްދިނުމަކީ ސަރުކާރުން ކޮންމެހެން ކުރަންޖެހޭ ކަމަކަށްވާތީ، ގަލޮޅު މަދަރުސާގައި 4 އަހަރުގެ ކުއްޖަކަށް ޖިންސީ ގޯނާޚުރި މައްސަލައިގެ ފުރިހަމަ ތަހުގީގެއް ހިންގާ، އެކަމުގައި އިހުމާޅުވި ފަރާތްތަކަށް ފިޔަވަޅުއަޅާ، މިފަދަ ކަންކަން ތަކުރާރުނުވާނެފަދަ ގޮތަަކަށް ސްކޫލްތަކުގެ ނިޒާމު އިތުރަށް ހަރުދަނާ ކުރުމަށާއި، ސުކޫލްތަކުގައި ދަރިވަރުންނަށް ރައްކާތެރިކަން ކަށަވަރުކޮށްދިނުމަށާއި، މިފަދަ މައްސަލަތަކުގައި ކަމާބެހޭ މުއައްސަސާތަކުން އަވަސް ފިޔަވަޅު އެޅުމަށް ސަރުކާރަށް ގޮވާލާ ރައްޔިތުންގެ މަޖިލީހުގެ ގަވައިދުގެ 179 ވަނަ މާއްދާގެ ދަށުންނެވެ.
