2022 ވަނަ އަހަރުގެ ބަޖެޓްގެ 26.4 އިންސައްތަ ހަރަދުކުރާނީ މުވައްޒަފުންގެ މުސާރައަށް ކަމަށް ހިމަަނައިފިއެވެ.
މަޖިލީހަށް މިއަދު ފިނޭންސް މިނިސްޓަރ ހުށަހެޅުއްވި ބަޖެޓްގައިވާގޮތުން 2022 ވަނަ އަހަރު 9759.8 މިލިއަން ރުފިޔާ މުވައްޒަފުންގެ މުސާރައަށް ހިނގާނެކަމަށް ލަފާކޮށްފައިވެއެވެ. މިއީ މިއަހަރުގެ ނިޔަލަށް މުވައްޒަފުންނަށް ހަރަދުވާނެކަމަށް ދައުލަތުން އަންދާޒާކުރާ މިންވަރަށްވުރެ 13.0 އިންސައްތަ އިތުރު އަދަދެކެވެ.
އެގޮތުން އަންނަ އަހަރުގެ ބަޖެޓްގައި އެންމެ ބޮޑު ހަަރަދެއް ހިނގާނެ ކަމަށް ލަފާކޮށްފައިވަނީވެސް މުވައްޒަފުންނަށް ހިނގާ އެކި ހަރަދުތަކަށެވެ. މިއާއެކު އެންމެ ކުޑަ އުޖޫރައިގެ ގޮތުގައި ދޭ މުސާރަ ހިމަނައިގެން އަންނަ އަހަރު ތައުލީމީ ދާއިރާއާއި ސިއްހީ ދާއިރާއަށް 700 އަށްވުރެ ގިނަ މުވައްޒަފުން ނެގުމަށް ބަޖެޓުގައި ވަނީ ހިމަނާފައެވެ.
މީގެ ތެރޭގައި ހިމެނެނީ 400 އައު މުދައްރިސުންނާއި 160 ޑޮކްޓަރުންނާއި 200 އަށްވުރެ ގިނަ ނަރުހުންނެެވެ. ތައުލީމީ އަދި ސިއްހީ ދާއިރާގެ މުވައްޒަފުންނަށް ކުރާ ހަރަދަށް ބަލާއިރު ތައުލީމީ ދާއިރާގެ މުވައްޒަފުންނަށް 2270 މިލިޔަން ރުފިޔާ ހަރަދުކުރުމަށް ބަޖެޓުގައި ކަނޑައަޅާފައިވެއެވެ. އަދި ސިއްހީ ދާއިރާގައި މަސައްކަތް ކުރާ މުވައްޒަފުންނަށް 2257 މިލިޔަން ރުފިޔާ ހަރަދުކުރުމަށް ވަނީ ނިންމާފައެވެ.
