ގަލޮޅު މަދަރުސާގައި ހަތަރު އަހަރުގެ ތުއްތު ކުއްޖާއަށް ޖިންސީ ގޯނާ ކުރި މައްސަލައިގެ ތުހުމަތުގައި ހައްޔަރު ކުރި 63 އަހަރުގެ މީހާ ދޫކޮށްލީ ހާއްސަ އުސޫލަކުން ކަމަށް ޕީޖީ އޮފީހުން ބުނެފިއެވެ.
ހަތަރު އަހަރުގެ ކުއްޖާއަށް ޖިންސީ ގޯނާ ކުރި މައްސަލާގައި 63 އަހަރުގެ މީހާ ބަންދުގައި ބަހައްޓަން ނުފެންނަ ކަމަށް ނިންމާ ދޫކޮށްލީ ކީއްވެތޯ ސުވާލު ކުރުމުން ޕީޖީ އޮފީހުގެ ފަރާތުން އަހުމަދު ޝަފީއު ވިދާޅުވީ، މި މައްސަލައިގައި ޕީޖީއަށް މިހާތަނަށް ހުށަހެޅުނު ލިޔުންތަކާއި، ލިބިފައިވާ މައުލޫމާތުތަކާއި ވަށައިގެންވާ އެންމެހާ ކަންކަމަށް ރިއާޔަތްކޮށް ބެލިއިރު، މައްސަލާގައި ތުހުމަތުކުރެވޭ މީހާ، ކުޑަކުދިންނަށް ޖިންސީ ގޯނާ ކުރާ މީހުންނާމެދު ހާއްސަ އުސޫލުތަކަކަށް އަމަލުކުރުމުގެ ގާނޫނުގެ 30 ވަނަ މައްދާގެ ދަށުން، ބަންދުގައި ބަހައްޓަންޖެހޭ ފަދަ ސަބަބެއް މިވަގުތުއޮތް ކަމަށް ނުފެންނާތީ ކަމަށެވެ.
ޖިންސީ ގޯނާގެ ތުހުމަތު ކުރެވޭ 63 އަހަރުގެ އަންހެން މީހާ ހައްޔަރު ކޮށްފައިވަނީ އިއްޔެގެ ވަގުތެއްގައެވެ. ނަމަވެސް މިއަދު އެއަންހެން މީހާ ދޫކޮށްލުމުން ގިނަ ބަޔަކު ދަނީ ސޯޝަލް މީޑިއާގައި ވެސް ފާޑު ކިޔަމުންނެވެ.
