އިދިކޮޅު ޕީޕީއެމް ޕީއެންސީން އިންތިޒާމުކޮށްގެން ހުކުރު ދުވަހު ބޭއްވުމަށް ނިންމި މިނިވަންކަމުގެ 'ޤައުމީ ބޮޑު ހިނގާލުން' ފަސްކޮށްފިއެވެ.
ނައިފަރު ދާއިރާގެ މެމްބަރު އަހުމަދު ޝިޔާމް ކުރެއްވި ޓުވީޓެއްގައި ވިދާޅުވީ، މި ސުލްހަވެރި ހިނގާލުން މޫސުން ތަންނުދޭތީ ފަހުގެ ތާރީހަކަށް ބަދަލުކުރެވިފައިވާ ކަމަށެވެ. އަދި އިވެންޓު ބާއްވާނެ ވަކިތާރީހެއް ފަހުން އިއުލާން ކުރެވިގެންދާނެ ކަމަށް ވެސް ޝިޔާމް ވިދާޅުވިއެވެ.
އިދިކޮޅުގެ ހިނގާލުން ކުރިން ބޭއްވުމަށް ނިންމާފައިވަނީ 5 ނޮވެމްބަރު ވާ ހުކުރު ދުވަހު (މާދަމާ) ހަވީރު 3:45 ގައި ޕީ.ޕީ.އެމް އޮފީސް ކުރިމަތިން ފެށޭ ގޮތަށެވެ. އަދި ރާއްޖޭގެ މިނިވަން ކަމަށް ލޯބިކުރައްވާ ހުރިހާބޭފުޅުންނަށް ސުލްހަވެރި މި ހިނގާލުމުގައި ބައިވެރިވުމަށް އޭރު ޕީޕީއެމުން ވަނީ އެދިފައެވެ.
އިދިކޮޅު ޕީޕީއެމް ޕީއެންސީ ކޯލިޝަނުން އަންނަނީ މިފަހަކަށް އައިސް ތަފާތު ނަން ނަމުގައި ހިނގާލުންތައް ބާއްވަމުންނެވެ. އަދި މިއިން ކޮންމެ ހިނގާލުމެއްގައިވެސް ގިނަ ބަޔަކު އަންނަނީ ބައިވެރިވަމުންނެވެ. އިދިކޮޅުން ވަނީ ނިމިގެން ދިޔަ ހަފްތާގައިވެސް ހިނގާލުމެއް ބާއްވާފައެވެ.
އެންމެ ފަހުން ޕީޕީއެމް ޕީއެންސީ ކޯލިޝަނުން ބޭއްވި ހިނގާލުމުގައި މި ދެ ޕާޓީގެ ލީޑަރޝިޕްގައި އުޅުއްވާ ގިނަ އަދަދެއްގެ ފަރާތްތައް ވަނީ ބައިވެރިވެފައެވެ.
