މިއަހަރު، ތަކެތީގެ އަގު މައްޗަށް ގޮސް މުދާ ހޯދުމަށް ވަނީ ދަތިވެފައި ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
ސަރުކާރުން މަޖިލީހަށް ހުށަހަޅާފައިވާ 2022 ވަނަ އަހަރުގެ ބަޖެޓު ބަހުސްގައި މެންބަރުން ފާހަގަ ކުރެއްވި ކަންތައްތަކަށް މަޖިލީހުގެ މިއަދުގެ ޖަލްސާގައި ޖަވާބު ދެއްވަމުން އަމީރު ވިދާޅުވީ، އަންނަ އަހަރު ތަކެތީގެ އަގު ބޮޑުވިޔަނުދީ ހިފެހެއްޓޭނެ ކަމަށެވެ. އަދި 2020 ވަނަ އަހަރު ހުއްޓިފައި ހުރި އިގުތިސާދުތައް ރަނގަޅުވެ ހުރިހާ ދަތިތަކެއް ހައްލު ކުރެވި ބާރު ސްޕީޑުގައި ކުރިއަރާ ދާ ކަމަށާއި މިއާއެކު އިތުރުވަމުންދާ ޑިމާންޑާ އެއްވަރަށް މިވަނީ ދުނިޔޭގެ ސަޕްލައި ޗޭނަށް ހިފަހައްޓައިނުލެވި ކަމަށެވެ.
ފިނޭންސް މިނިސްޓަރު އަމީރު ވިދާޅުވީ، ދުނިޔެއަށް ކުރިމަތިވެފައިވާ ކޮވިޑް-19ގެ ބަލިމަޑުކަމުން އަރައިގަނެ ދުނިޔޭގެ އިގުތިސާދު ވަރަށް ބާރު ސްޕީޑުގައި މިހާރު ކުރިއަރަމުންދާ ކަމަށެވެ. އަދި ޑިމާންޑާ އެއްވަރަށް ސަޕްލައި ހިފަހައްޓައި ނުލެވުމުގެ ސަބަބުން މިއަހަރު، ތަކެތީގެ އަގު މައްޗަށް ގޮސް މުދާ ހޯދުމަށް ދަތިވެފައިވާ ކަމަށެވެ.
ރާއްޖެއަކީ ބޭނުންވާ ގިނަ މުދާ އިމްޕޯޓް ކުރަންޖެހޭ ގައުމަކަށް ވާއިރު ދުނިޔޭގެ ބާޒާރުގައި އަގުތަކަށް އަންނަ ބަދަލު ރާއްޖޭގެ އިމްޕޯޓް ކުރާ އަގަށާއި ގެންނަ މުދަލުގެ އަގަށް އަންނާނެކަން ގަބޫލުކުރައްވާ ކަމަށެވެ. ނަމަވެސް އެއީ ވަގުތީ ކަމެއް ކަމަށް މިނިސްޓަރ އަމީރު ވިދާޅުވިއެވެ.
