އެއްވެސް މުއައްސަސާއަކުން 2022 ވަނަ އަހަރު އެ މުއައްސަސާއަކަށް ސަރުކާރުން ދިނުމަށް ނިންމާފައިވާ ބަޖެޓް ބޮޑުކޮށްދޭން އެދުނު ކަމުގައިވިއަސް އެކަން ކުރެވެން ނެތް ކަމަށް ފިނޭންސް މިނިސްޓަރ އިބްރާހިމް އަމީރު ވިދާޅުވެއްޖެއެވެ.
ރައްޔިތުންގެ މަޖިލީހުގެ ބަޖެޓް ދިރާސާ ކުރާ ކޮމިޓީގެ ފަރާތުން މިއަދު ފިނޭންސް މިނިސްޓަރާއެކު ބޭއްވި ބައްދަލުވުމުގައި ވާހަކަފުޅު ދައްކަވަމުން އަމީރު ވިދާޅުވީ، ސަރުކާރުން މަޖިލީހަށް ހުށަހަޅާފައިވާނީ އެންމެ އަންނަ އަހަރަށް ހުށަހެޅޭނެ އެންމެ ބޮޑު ބަޖެޓް ކަމަށެވެ. އަދި ސަރުކާރުގެ ވުޒާރާތަކުގެ އިތުރުން މިނިވަން މުއައްސަސާތަކުން އެދިފައި ހުރި ބަޖެޓް އެ ގޮތަށް ބަދަލުކޮށްފިނަމަ 60-70 ބިލިއަނަށް ވުރެ ބަޖެޓް ބޮޑުވެގެން ދާނެ ކަމަށް ފިނޭންސް މިނިސްޓަރ ވިދާޅުވިއެވެ.
ކޮވިޑް19ގެ ބަލިމަޑު ކަމުގައި ގައުމު އޮތްއިރު މިހާ ބޮޑު އަދަދެއްގެ ބަޖެޓެއް ހުށަހެޅުމަކީ ކުރެވޭނެ ކަމެއް ނޫން ކަމަށްވެސް މިނިސްޓަރ މިއަދު ވިދާޅުވިއެވެ. މީގެ އިތުރުން މިހާރު މަޖިލީހުން ދިރާސާ ކުރަމުންދާ ބަޖެޓްގައި ކޮންމެހެން ވުޒާރާތަކާއި މުއައްސަސާތަކުން ކުރަންޖެހޭ ކަންކަން ކުރުމަށް ބަޖެޓް ދީފައިވާނެ ކަންވެސް އަމީރު ފާހަގަކުރެއްވިއެވެ.
ރައްޔިތުންގެ މަޖިލީހުގެ ބަޖެޓް ދިރާސާ ކުރާ ކޮމިޓީން ވަނީ މިއަދުވެސް ގިނަ މުއައްސަސާތަކަކާއި ބައްދަލުކޮށްފައެވެ. އެގޮތުން އިލެކްޝަންސް ކޮމިޝަނާއި، ސިވިލް ސާރވިސް ކޮމިޝަނާއި، ހިއުމަން ރައިޓްސް ކޮމިޝަން އޮފް ދަ މޯލްޑިވްސް އާއި، ޖުޑީޝަލް އެޑްމިނިސްޓްރޭޝަންގެ ބޭފުޅުންނާއި، މޯލްޑިވްސް މަނިޓަރީ އޮތޯރިޓީގެ ބޭފުޅުންނާ އަދި އޮޑިޓަރ ޖެނެރަލްގެ އޮފީހުގެ ބޭފުޅުންނާ ވެސް ބަޖެޓު ދިރާސާކުރާ ކޮމިޓީއިން 2022 ވަނަ އަހަރުގެ ދައުލަތުގެ ބަޖެޓާ ގުޅޭގޮތުން ވަނީ ބައްދަލުކޮށްފައެވެ.
