ސިއްރު އެއްބަސްވުންތަކުން މިނިވަންކަމާއި އިސްތިގުލާލު ގެއްލިފައިވާކަން ހާމަވޭ: އިދިކޮޅު

ޕީޕީއެމުން ނެރެފައިވާ ބަޔާނެއްގައި ބުނެފައިވަނީ އިންޑިއާ އާއިއެކު މި ސަރުކާރުން ހަދަމުން ގެންދާ ގޮތް ނޭނގޭ އެއްބަސްވުންތަކުގެ ސަބަބުން ދިވެހިރާއްޖޭގެ މިނިވަންކަމާއި އިސްތިގްލާލަށް ގެއްލުން ވާ ފަދަ އެތައް ކަމެއް ހިނގަމުންދާތީ، އެކަމުގެ ކަންބޮޑުވުން ފާޅުކޮށް އެއްބަސްވުންތައް ހާމަކުރުމަށް އެ ކޯލިޝަނާއި މީޑިއާތަކާއި ދިވެހި ރައްޔިތުން ދަނީ ކެނޑިނޭޅި ގޮވާލަމުން ކަމަށެވެ.

އެހެންނަމަވެސް އެއްބަސްވުންތަކުގައި ގައުމީ ސަލާމަތަށް ނުރައްކާވާފަދަ މަޢުލޫމާތު ހުރިކަމަށް ބުނެ ސިއްރުކޮށްގެން އެތައް ދުވަހެއްވަންދެން ބޭއްވުމަށްފަހު ރައްޔިތުންގެ ޕްރެޝަރާއެކު ރައްޔިތުންގެ މަޖިލީހުގެ ކޮމިޓީއަކާއި އެ އެއްބަސްވުންތައް ހިއްސާކޮށްފައިވާ ކަމާއި، ހިއްސާކޮށްފައިވާ އެއްބަސްވުންތަކުން، ރާއްޖޭގެ މިނިވަންކަމާއި އިސްތިޤުލާލު ގެއްލިގެންދާނެ އެތައްކަމެއް ހުރިކަމުގެ މަޢުލޫމާތުތައް ވަނީ ލިބިފައި ކަމަށްވެސް ޕީޕީއެމްގެ ބަޔާނުގައި ވަނީ ފާހަގަކޮށްފައެވެ.

އަދި އެއްބަސްވުން ހާމަކުރަމުން މިސަރުކާރުގެ ޑިފެންސް މިނިސްޓަރު މާރިޔާ ދީދީ ދެއްކެވި ވާހަކަތަކުގައި އިންޑިއާ ސަރުކާރުގެ ޑޯނިއާރ މަތިންދާ ބޯޓާއި 2 ހެލިކޮޕްޓަރު ދުއްވުމުގައި އިންޑިއާގެ 75 ސިފައިން މިޤައުމުގައި ތިބިކަމަށް ބުނެފައިވާތީ އެކަމުގެ ކަންބޮޑުވުން ދިވެހި ރައްޔިތުން ގެންދަނީ ފާޅުކުރަމުން ކަމަށާއި އަދި ފްލައިޓާއި، ހެލިކޮޕްޓަރު ދުއްވަން އިންޑިއާ ސިފައިންގެ 75 މީހުން ރާއްޖޭގައި ތިބިކަމަށް ޑިފެންސް މިނިސްޓަރ މާރިއާ ދީދީ ވިދާޅުވެފައިވާއިރު، ރާއްޖޭގައި ގިނަ ޢަދަދެއްގެ އިންޑިއާ ސިފައިން ތިބިކަން ކަށަވަރުވެފައިވާ ކަމަށްވެސް އެބަޔާނުގައި ބުނެފައިވެއެވެ.

މީގެ އިތުރުން ރާއްޖޭގައި ތިބި އިންޑިއާގެ ގިނަ ޢަދަދެއްގެ ސިފައިންނަށް ޑިޕްލޮމެޓިކް އިމިޔުނިޓީ ދީފައިވާކަންވެސް އޮތީ ފާޅުކަން ބޮޑުކޮށް ފެންނާން ކަމަށާއި މީގެ އިތުރުންވެސް އިންޑިއާ ސަރުކާރާއެކު ހެދިފައިވާ ހައިޑްރޯގްރަފީ އެއްބަސްވުމުންވެސް ރާއްޖޭގެ ކަނޑުގެ ޗާޓު ބޭރު ޤައުމަކަށް ވިއްކާލާފައިވާކަން ވަރަށް ސާފުކޮށް ފެންނާން އޮތްކަން ފާހަގަކޮށް، ރާއްޖޭގެ ސްޓްރެޓީޖިކް މައުލޫމާތުތައް ވިއްކައިގެން ނަފާ ހޯދުމުގެ ސިޔާސަތުތަކެއް ސަރުކާރުން ގެންގުޅުމަކީ ދިވެހި ރައްޔިތުން ބަލައިގަންނަ ކަމެއް ނޫން ކަމަށްވެސް ވަނީ ބުނެފައެވެ.

ހަމައެއާއެކު، ދިވެހުރާއްޖޭގެ ސަރަޙައްދުގައިވާ އެންމެހާ ތަކެއްޗަށް ދިވެހިރައްޔިތުން އަމިއްލައަށް ބަސްބުނެ ގޮތް ނިންމުމުގެ ބާރު އެއްކޮށް ދިވެހީންނަށް ގެއްލިފައިވާކަން މިދަނީ ހާމަވަމުން ކަމަށާއި މިނިވަން ޤައުމެއްގެ ގޮތުގައި އަމިއްލަ ސަރަޙައްދަށް އަމިއްލަ ބާރު ގެއްލި ބަސްބުނުމުގެ ފުރުޞަތުވެސް އެއްކޮށް ގެއްލުވާލައި ނާޖާއިޒު ފައިދާތައް ނަގަމުން ގެންދާއިރު، އެކަމަށް ޖަވާބުދާރީ ވާނެ އެއްވެސް ފަރާތެއް ދިވެހި ސަރުކާރުގައި ނެތްކަންވެސް ވަނީ ފާހަގަކޮށްފައެވެ.

އެހެންނަމަވެސް ފެންނަމުންދާ މަންޒަރަކީ، ޤައުމު ތަރައްޤީ ކުރުމުގެ ބަދަލުގައި ޤައުމުގެ ހަރުމުދާ ވިއްކާ، ޤައުމުގެ މިނިވަންކަމާއި އިސްތިޤުލާލު އެހެން ބައެއްގެ އަތްދަށަށް ފުރޮޅާލާ ތަން ކަމަށްވެސް އިދިކޮޅުގެ ބަޔާނުގައި ބުނެފައިވެއެވެ.