މީހުން މޮނިޓަރ ކުރުމަށް އިލެކްޓްރޯނިކް ނިޒާމް ގާއިމު ކުރުމަށް ބޭނުންވާ ތަކެތި ހޯދަން ހޯމް މިނިސްޓްރީން އިއުލާންކޮށްފިއެވެ.
ހޯމް މިނިސްޓްރީން ކޮށްފައިވާ އިއުލާނެއްގައި ބުނެފައިވަނީ މީހުން މޮނިޓަރ ކުރުމަށްޓަކައި އިލެކްޓްރޯނިކް ނިޒާމް ގާއިމު ކުރުމަށް ބޭނުންވާ ތަކެއްޗާއި، އެ ހިދުމަތް ގާއިމުކޮށްދިނުމާއި، އަދި ޓްރޭނިންގ ދޭނެ ފަރާތެއް ހޯދުމަށް ބޭނުންވާތީ މިކަން ކޮށްދޭނެ ފަރާތެއް ހޯދުމަށް ބީލަން ހުށަހެޅުމުގެ ފުރުސަތު ހުޅުވާލާ ކަމަށެވެ.
އެގޮތުން މި ބީލަމުގައި ބައިވެރިވާން ބޭނުންވާ ފަރާތްތަކުން، 18 ނޮވެންބަރު 2021 ވާ ބުރާސްފަތި ދުވަހުގެ 1:00 ގެ ކުރިން މަޢުލޫމާތުތައް [email protected] އަށް މެއިލް ކޮށް ބީލަމުގައި ރަޖިސްޓަރީ ކުރުމަށް މިނިސްޓްރީން ވަނީ އެދިފައެވެ.
ހޯމް މިނިސްޓްރީން ވަނީ މިމައުލޫމާތުތައް ހިމެނުމަށް އެދިފައެވެ.
- ބީލަމުގެ ނަމާއި އިޢުލާނު ނަންބަރު
- އަންދާސީ ހިސާބު ހުށަހަޅާ ކުންފުނި/ އަމިއްލަ ފަރުދެއްނަމަ ނަން
- ގުޅޭނެ ނަންބަރު އަދި އީމެއިލް އެޑްރެސް
- ބީލަން ހުށަހަޅާ ފަރާތް ތަމްސީލުކުރާނެ ފަރާތުގެ ނަމާއި މަޤާމު/ އަމިއްލަ ފަރުދެއްނަމަ އައިޑީ ކާޑު ނަންބަރު
އަދި މި ބީލަން ހުށަހެޅުމާއި، ހުޅުވުން އޮންނާނީ 24 ނޮވެންބަރު 2021 ވާ ބުދަ ދުވަހުގެ 1:00 ގައި މިނިސްޓްރީ އޮފް ހޯމްއެފެއާޒް/ ވެލާނާގެ 10 ވަނަ ފަންގިފިލާގައި ކަމަށާއި އަންދާސީ ހިސާބު ހުށަހެޅުމަށް އޮންނަ ގަޑިއަށް ވަޑައިނުގަންނަވާ ފަރާތްތަކުގެ އަންދާސީ ހިސާބު ބަލައި ނުގަނެވޭނެކަމަށް އެމިނިސްޓްރީން ވަނީ ހާމަކޮށްފައެވެ.
