ވެކްސިންގެ ތިންވަނަ ޑޯޒް ފަސްހާހަށްވުރެ ގިނަ މީހުން ޖަހައިފިއެވެ.
އެޗްޕީއޭއިން އާއްމުކޮށްފައިވާ ތަފާސް ހިސާބުތަކަށް ބަލާއިރު އިއްޔެ އެކަނިވެސް 191 މީހުން ތިން ވަނަ ޑޯޒް ޖަހާފައެވެ. މިއާއެކު ވެކްސިންގެ ބޫސްޓަރ ޑޯޒް ޖެހި މީހުންގެ އަދަދު ވަނީ 5،390 އަށް އަރާފައެވެ. އެންމެ ގިނަ ބަޔަކު އިއްޔެ ބޫސްޓަރ ޑޯޒް ޖެހީ މާލެ ސަރަހައްދުންނެވެ. އެއީ 113 މީހުންނެވެ. އަތޮޅު ތެރެއިން އިއްޔެ ބޫސްޓަރ ޑޯޒް ޖެހީ 78 މީހުންނެވެ.
ރާއްޖެއިން މިހާތަނަށް ވެކްސިންގެ ފުރިހަމަކޮށްފައިވަނީ 395،195 މީހުންނެވެ. މީގެ ތެރޭގައި ހިމެނެނީ ދެ ޑޯޒް ފުރިހަމަ ކުރި 361، 391 މީހުންނެވެ.
ބޫސްޓަރ ޑޯޒް ޖަހަން ނިންމީ ވެކްސިންގެ 2 ޑޯޒް ފުރިހަމަކޮށްފައިވާ ފަރާތްތަކުގެ ތެރެއިން ބަލިޖެހުމުން ނުރައްކާ ބޮޑުވެދާނެ ފަރާތްތަކާއި ފްރައިންޓްލައިންގައި މަސައްކަތް ކުރައްވާ ސިއްހީ ހިދުމަތްތެރިންނަށް އިތުރު ވެކްސިން ޑޯޒްއެއް ދިނުމަށް މޯލްޑިވްސް ޓެކްނިކަލް އެޑްވައިޒަރީ ގްރޫޕް އޮން އިމިއުނިޒޭޝަނުން ލަފާދިނުމުންނެވެ. އިތުރު ވެކްސިން ޑޯޒް ޖަހާނީ ކޮވިޑް19ގެ އެއްވެސް ވެކްސިނެއްގެ 2 ވަނަ ޑޯޒްޖެހިފަހުން 6 މަސް ދުވަސް ފުރިހަމަވެފައިވާ ފަރާތްތަކަށެވެ.
މިވަގުތު ކޮވިޑް19 ވެކްސިންގެ އިތުރު ޑޯޒް ޖެހުމަށް ހަމަޖެހިފައިވާ ފަރާތްތަކަކީ ފްރަންޓްލައިންގައި މަސައްކަތް ކުރައްވާ ސިއްހީ ހިދުމަތްތެރިން، 60 އަހަރުން މަތީގެ މީހުން އަދި ދިފާއީ ނިޒާމު ބަލިކަށި މީހުންނަށް ކަމަށް އެޗްޕީއޭއިން ހާމަކުރެއެވެ.
