"އޭޝިއާސް ކޯޕަރޭޓް އެކްސެލެންސް އެންޑް ސަސްޓެއިނަބިލިޓީ އެވޯޑްސް 2021"ގެ މޯސްޓް އިންސްޕަޔަރިންގ އެގްޒެކެޓިވްސް އެވޯޑް ސްޓެލްކޯގެ މެނޭޖިންގ ޑިރެކްޓަރ ހަސަން މުޣުނީއަށް ލިބިއްޖެއެވެ.
މިއީ އޭޝިއާ ސަރަހައްދުގެ އެންމެ ޝަރަފުވެރި އެއް އެވޯޑެވެ. މި އެވޯރޑަކީ މެލޭޝިއާގެ މޯރސް ގްރޫޕުން އިންތިޒާމްކޮށްގެން ދޭ އެވޯޑެކެވެ. މިއީ ދިވެއްސަކަށް މި އެވޯރޑް ލިބުނު ފުރަތަމަ ފަހަރެވެ. ނިމިގެންދިޔަ 3 އަހަރު ސްޓެލްކޯގެ މެނޭޖިންގ ޑިރެކްޓަރުގެ މަގާމުގައި ހުރެ އެކުންފުންޏާއި، އެނާޖީ ސެކްޓާގެ ކުރިއެރުމަށް ކުރަމުން ގެންދާ މަސައްކަތްތަކާއި، ކުންފުނި ކުރިއަރައިގެންގޮސްފައިވާ ހަލުވި މިނާ ގުޅިގެންނެވެ.
މި އެވޯރޑް މުޣުނީއަށް ލިބުނު ސަބަބުތަކުގެ ތެރޭގައި 2019 ވަނަ އަހަރު މޯލްޑިވްސް ބިޒްނަސް އެވޯޑްސްގައި ސަރުކާރު ކުންފުނިތަކުގެ ތެރެއިން އެންމެ ރަނގަޅު ކުންފުނީގެ އެވޯޑް ސްޓެލްކޯއަށް ލިބިފައިވުމާއެކު، 2021 ވަނަ އަހަރު "އެވޯޑް ފޯ އިންސްޓިޓިއުޝަން ބިލްޑިން"ގެ އެވޯޑް ސްޓެލްކޯއަށް ލިބުންވެސް ހިމެނެއެވެ.
އަދި ސްޓެލްކޯގެ ހިންގުން ހަރުދަނާ ކޮށް ކޯޕަރޭޓް ގަވަރނެންސްގެ ދާއިރާއިން ސްޓެލްކޯ ހޯދަމުންދާ ކުރިއެރުންތަކާއެކު، 2020 ވަނަ އަހަރު ކޯޕަރޭޓް ގަވަރނެންސް އެންމެ ރަނގަޅު ކުންފުންޏަކަށް ސީ.އެމް.ޑީ.އޭއިން ދޭ "ސީޖީ އެފޯޓްސް އެވޯޑް"ވެސް ވަނީ މީގެ ކުރިން އެކުންފުންޏަށް ލިބިފައެވެ.
